हामी सबैकाे संसारन्यूज

काठमाडौं । वरिष्ठ शिक्षाविद् तथा भारत र भुटानका लागि पूर्वनेपाली राजदूत प्रा. हर्षनारायण धौभडेलको ९० वर्षको उमेरमा क्यानाडाको क्यालगरीमा निधन भएको छ।

पारिवारिक स्रोतका अनुसार लामो समयदेखि पार्किन्सन्स रोगबाट पीडित धौभडेल पछिल्लो समय छोरी निशासँग क्यालगरीमा बस्दै आएका थिए । उनका चार छोरीमध्ये तीन जना क्यानाडा र एक जना अमेरिकामा बसोबास गर्दै आएका छन्।

शिक्षा क्षेत्रमा लामो समय योगदान पुर्‍याएका धौभडेल त्रिभुवन विश्वविद्यालयका प्राध्यापकसमेत रहेका थिए उनी पेसागत महासंघ नेपालको पूर्वअध्यक्षका रूपमा पनि सक्रिय रहेका थिए ।

वि.सं. २०५० सालमा भएको चर्चित तथा रहस्यमय दासढुङ्गा दुर्घटनाको छानबिन गर्न गठित आयोगका सदस्य समेत रहेका धौभडेलले सार्वजनिक जीवनका विभिन्न क्षेत्रमा महत्वपूर्ण जिम्मेवारी निर्वाह गरेका थिए । उनी सन् १९९५ देखि १९९६ अर्थात् वि.सं. २०५१ सालसम्म भारत र भुटानका लागि नेपाली राजदूत रहेका थिए ।

शिक्षा, कूटनीति तथा सार्वजनिक सेवाका क्षेत्रमा महत्वपूर्ण योगदान पुर्‍याएका प्रा। धौभडेलको निधनले नेपालले एक अनुभवी शिक्षाविद्, कूटनीतिज्ञ तथा सार्वजनिक व्यक्तित्व गुमाएको छ।