Sansar News
२९ पुष, काठमाण्डौं । अर्धभूमिगतका रुपमा रहेका नेकपा मसालका महामन्त्री मोहन बिक्रम सिंह अब टिभीमा देखिने भएका छन् ।
अर्धभूमिगतरुपमा रहेका नेताको पार्टी अझै भूमिगत छ । तर, अब महामन्त्री सिंहलाई भने टिभीमा देख्न पाइने भएको छ । महामन्त्री सिंहले आफ्नो पार्टीमा अन्तरवार्ता दिन र देखिन मिल्ने निर्णय गराएका छन् । महामन्त्री सिंहले यसलाई पार्टीको निर्णय भन्दै ८५ वर्षको उमेरमा टिभीमा देखिन रहर गरेका छन् ।
किन देखिने भए त टिभीमा महामन्त्री ?
टिभीमा देखिन लागेको बारेमा गरिएको कुराकानीमा महामन्त्री सिंहले आफू टिभीमा देखिएर प्रत्यक्ष कुराकानी गर्दा वा अन्य रुपमा देखिदा जनता सामु आफ्नो विचार प्रभावकारी रुपमा संप्रेषण हुने निष्कर्षका आधारमा पार्टीले यस्तो निर्णय गरेको सिंहको तर्क गरेको सोमबारको नयाँपत्रिका दैनिकमा समाचार छ ।
‘टेलिभिजनमा दृश्यसहित देखिन जाने निर्णय मेरो व्यक्तिगत इच्छा होइन । मैले चाहेर पनि केही हुँदैन । पार्टीको राष्ट्रिय परिषद् बैठकले टेलिभिजनमा दृश्यसहित जाँदा उपयुक्र्त हुन्छ भन्ने भएपछि निणय भयो,’ व्यक्तिगत इच्छा नभएको दोहोर्याउँदै सिंहले भने, ‘तर म खुला आमसभा, सेमिनार, गोष्ठिमा जान पाउँदिन । यो पार्टीले निर्णय गरेकै छैन । खालि टेलिभिजनमा दृश्यसहित देखिने गरी जाने निर्णय भयो ।’
नेकपामा एमसीसी संसदबाटै अनुमोदन गर्ने कि नगर्ने, सभामुख कसलाई बनाउने र उपसभामुखको राजीनामाको झगडा छ । कांग्रेसमा १४ औं महाधिबेशन केन्द्रीत झगडा चलिरहेको छ । तर, मसालले भने महामन्त्रीलाई टेलिभिजनमा देखाउन सक्ने निर्णय गरेर धेरैलाई अचम्मको बनाएको भन्ने विश्लेषण समेत गरिएको छ ।
वि.सं.२०७६ पुस २८ सोमवार ०९:३३ मा प्रकाशित
