हामी सबैकाे संसारन्यूज

७ माघ, भारत । फेसबुकमा ६ हजार फलोअर भएको भन्दै एक युवाले आफ्नी श्रीमतीको हत्या गरेका छन् ।

यो घटना हो, भारतको जयपुरको आमेर इलाकाको । यहाँका एक युवाले आफ्नी श्रीमतीको चरित्रमाथि संका गर्दै २ वर्षअघि प्रेम विवाह गरेर ल्याएकी २२ वर्षीया श्रीमतीको हत्या गरेको दैनिक भास्करले लेखेको छ ।

अहमद अन्सारी नामक ती २६ वर्षीय युवाले आफ्नी श्रीमती रेशमा उर्फ नैना मंगलानीको हत्या गरेका हुन् ।
श्रीमती दिनभर फेसबुकमा व्यस्त रहने गरेको र उनको फेसबुकमा ६ हजार बढी फलोअर रहेको विषयलाई लिएर उनीहरुको झगडा हुने गरेको थियो । त्यहि रिसमा आइतबार माइतमा रहेकी श्रीमतीलाई ती युवाले घुमाउने लैजाने बहानामा बोलाए । दिनभर घुमाएर राति हत्या गरेको प्रहरीले जनाएको छ ।

उनीहरुको तीन महिनाको छोरा पनि रहेको बताइएको छ । ती युवा अहिले प्रहरी हिरासतमा छन् ।

उनले प्रहरी सामु भनेका छन् ‘आइतबार रेशमालाई बोलाएर बियर खुवाए । त्यसपछि राति आमेर इलाकामा जयपुर–दिल्ली हाइवेमा रहेको माताको मन्दिर नजिकको सुनसान ठाउँमा घाँटी थिचेर हत्या गरिदिए । मृतक उनी नै हुन् भनेर पहिचान नहोस् भनेर ठूलो ढुंगाले उनको टाउको र मुखमा थिचेको थिए ।’ स्कुटीमा गएका ती युवाले स्कुटी नै झाडीमा फ्याकेर भागेको बताइएको छ । सोमबार बिहान ती महिलाको शब भेटिएको थियो ।

पछिल्लो समय श्रीमानले शंका गरेको भनेर रेश्माले डिभोर्स मागेकी पनि बताइएको छ ।