Sansar News
सोमबार यातायात कार्यालय पुगेर सवारी प्रदूषण परीक्षणको काम गराउँदा भोगेका व्यक्तिगत अनुभवहरु तपाईहरु समक्ष सेयर गर्न चाहान्छु ।
दुई घण्टा प्रदूषण परिक्षण गराउने गाडीहरूको लाईनमा बसेर पालो कुर्दा र काम सकेर आउँदासम्म भोगेका कुराहरुको नालीबेली तल उल्लेख गरेको छु ।
१-२ घंटा प्रदूषण परिक्षण गराउने गाडीहरूको लाईन लागेर पालो कुरियो ।
२- प्रदूषण परीक्षण कक्षमा पुगेर प्रदूषण स्टिकरका लागि शुल्क तिर्न लाईन लागेको । प्रदूषण स्टिकरको म्याद सकिनुअघिको स्टिकर शुल्क ३५\-, म्याद सकिएको ७ देखि १ महिनासम्म थप रू १०० जरिवाना र १ महिना नाघेपछि रू ११०५ प्रदूषण शुल्क लाग्ने रहेछ ।
४-त्यहाँ जरिवानासहित रू ११०५ तिरेर प्रदूषण परीक्षणमा लाईन लागेर परीक्षण गराईयो ।
५- त्यसपछि जरिवाना तिर्न भर्नुपर्ने अलग्गै फाराम किन्न अर्को ठाउँमा महानगरपालिकाले राखेको निवेदन फारम बिक्रीकक्षमा लाईन लागेर रू १०\-फाराम किनियो ।
६- जरिवानाको निवेदनसाथ रू १०\- को हुलाक टिकट टाँस्नुपर्ने रहेछ, टिकट बिक्री बुथमा लाईन लागेर रू १०÷– को टिकट किनियो ।
७. जरिवाना निवेदन फाराममा टिकट टाँसेपछि फाराम भरेर सो निवेदन माथि तोकआदेश लगाउन अर्को तोक कक्षमा लाईन लागेर तोक लगाइयो ।
८-तोक लगाएको निवेदन लिएर अर्को स्टिकर बितरण कक्षमा गई लाईन लागेर स्टिकर निकाशा गरियो ।
९- प्राप्त स्टिकर प्रमाणित गराउन अर्को कक्षमा गएर प्रमाणित गराई स्टिकर हात पारियो ।
१०- सो स्टिकर आफूले लिएर गाडीको सिसामा टाँसियो ।
यतिका दशक चरण पार गरेर घंटौ यता र उत्ता हुत्तिदै कुद्दै प्रदुषण परीक्षण गराउनुपर्ने, शुल्क तथा जरिवाना तिर्ने र अन्त्यमा प्रदूपण पास स्टिकर निकाशा हुँदो रहेछ ।
यसबाहेक एकै दिनमा ३-४ ठाउँमा बाटा–बाटामा ट्राफिक प्रहरीले गाडी रोकेर लाईसेन्स देखाउ, कागजपत्र देखाउ, ब्लुबुक देखाउ भन्दै मागेर सबै ओल्टाईपल्टाई हेरेर बल्ल जानुस् भन्दै जनतालाई दिईरहने ‘सुख सुबिस्ता’ त के कुरा गराई भयो र !
त्यसैले, ’द्विमत’ छैन, पक्कापक्की समृद्धि आयो आयो हाम्रो नेपालमा, यहाँ अहिले दुईतिहाँईको बामपन्थी संघीय गणतन्त्रामक सरकार जो छ ! जनतालाई यसरी पैसा तिर्न जाँदा पनि ‘झन्झट नदिई, सुखै सुख’ दिने यस्तो सरकारलाई जति ‘नमन’ गरे पनि खै के पुग्ला र !
उपाध्याय नेपाल सरकारका पूर्वसचिव हुन्
वि.सं.२०७६ माघ १४ मंगलवार ०८:५१ मा प्रकाशित
