हामी सबैकाे संसारन्यूज

१५ माघ, काठमाडौं । नेपाल कम्युनिष्ट पार्टी (नेकपा)को जारी केन्दीय कमिटी बैठकमा अध्यक्षद्वय केपी शर्मा ओली र पुष्पकमल दाहाल प्रचण्डले तयार गरेको राजनीतिक प्रतिवेदन पेश गरिएको छ । प्रतिवेदनमा पार्टी र सरकारविरुद्ध जनतामा भ्रम छर्नेगरी पार्टी अनुशासन र पद्धति विपरित बोल्ने, लेख्ने तथा त्यसविपरित भेला बैठक गर्ने काम बन्द गर्ने भनिएको छ । नेकपाको जारी केन्द्रीय समिति बैठकमा पेश भएको राजनीतिक प्रतिवेदनमा सो कुराको प्रस्ताव गरिएको हो ।

‘पार्टीलाई विधि, अनुशासनमा चल्ने शक्तिका रुपमा विकास गर्न आवश्यक छ । अनुशासनहिन काम गर्नेहरुलाई कारवाहीको दायरामा ल्याउनुपर्नेछ,’ नेकपाको प्रतिवेदनमा उल्लेख छ । त्यस्तै नेकपाको राजनीतिक प्रतिवेदनमा सरकारका कामहरुको सामान्य समिक्षा गरिएको छ । जसमा संघीय लोकतान्त्रिक गणतन्त्रको नयाँ प्रणाली र अभ्यासको सन्र्दभलाई ध्यानमा राख्नुपर्ने तथा पार्टी एकताको विशिष्ठता र यो प्रकृयामा भएको ढिलाईको सन्दर्भलाई पनि विचार गर्नुपर्ने उल्लेख छ ।

‘लामो समयसम्म पार्टी कमिटीहरुको अभावले गर्दा न सरकारले गरेका राम्रा कामहरुको व्यवस्थित रुपले जनतामा प्रचार हुनसक्यो न सरकारलाई कमिकमजोरीबाट बचाउन पार्टीले नेतृत्वदायी भूमिका नै खेल्न सक्यो,’ प्रतिवेदनमा भनिएको छ । त्यस्तै सरकारले संघीय प्रणाली कार्यन्वयनमा आवश्यक नीति र कानुनहरु बनाउनुलाई प्रतिवेदनले सकारात्मक भनेको छ ।

प्रतिवेदनमा राष्ट्रिय महाधिवेशन २०७७ चैतमा गर्न प्रस्ताव गरिएको छ । राजनीतिक प्रतिवेदनमा २०७७ चैतको अन्तिममा सकिने गरि राष्ट्रिय महाधिवेशन गर्न प्रस्ताव गरिएको हो । प्रतिवेदनमा २०७७ चैत २५ देखि ३० गतेसम्म महाधिवेशन गर्न प्रस्ताव गरिएको छ । यस्तैगरि २०७७ को भदौदेखि मंसिरसम्ममा सबै स्थानीय तह र प्रदेश तहका अधिवेशनहरु सम्पन्न गर्न प्रस्ताव गरिएको छ ।