२७ मङ्सिर,इस्तानबुल। टर्कीको सवै भन्दा ठूलो सहर इस्तानबुलको मध्यभागमा शनिबार राती भएको दुई वटा बम बिस्फोटमा परी मृत्यु हुनेको सङ्ख्या ३८ पुगेको बताइएको छ ।
घटनाको जिम्मेवारी टर्कीको कुर्दिस लडाकू समूहले लिएको बताइएको छ ।
सो विस्फोटमा परी २७ प्रहरी अधिकृतको समेत ३८ जनाको मृत्यु भएको बताइएको छ । उक्त घटनामा अन्य करिब १७० जना घाइते भएका स्थानीय सरकारी अधिकारीहरुले जानकारी दिएका छन् ।
बेसिक्टास जिल्लाको खेलमैदानमा फुटबल प्रतियोगिता सकिएको डेढ घण्टापछि मानिसहरुको भिडभाड भइरहेका बेला ड्युटीमा रहेका प्रहरीलाई लक्षित गरी सो विस्फोट गराइएको गृहमन्त्री सुलेम्यान सोएलुले पत्रकार सम्मेलनमा जानकारी दिनुभयो ।
राष्ट्रपति रेसेप तैयप एर्डोगानले ट्विटर एकाउण्टमा “हाम्रो संघर्ष जारी छ,” भन्दै घटनामा सम्लग्न दोषीलाई कानूनी कठघरामा उभ्याउने बताउनुभएको छ ।
इस्तानबुलमा पछिल्लो बम आक्रमण गत जुनमा भएको थियो । त्यतिबेला अन्तराष्ट्रिय विमानस्थलमा तीन वटा आत्मघाती बम हमला भएका थिए भने ४५ जनाको मृत्यु भएको थियो ।
टर्कीको सवै भन्दा ठूलो सहर इस्तानबुलको मध्यभागमा शनिबार राती भएको दुई वटा बम बिस्फोटमा परी दर्जनौं मानिसको मृत्यु भएपछि टर्कीमा आइतबार एक दिनको राष्ट्रिय शोक घोषणा गरिएको छ ।
विष्पोटपछि राष्ट्रपति एर्डोगानले आइतबारका लागि तय भएकोे आफ्नो काजकिस्तानको भ्रमण स्थगित गर्नु भएको छ । रासस÷एएफपी
वि.सं.२०७३ मंसिर २७ सोमवार ०३:०९ मा प्रकाशित
