हामी सबैकाे संसारन्यूज

१ फागुन, काठमाण्डौं । कुवेतमा निर्माणस्थलमा भएको दुर्घनामा १३ नेपाली पुरिएको आशंका गरिएको छ ।

मंगलबार कुवेतको मुत्ला भन्ने ठाउँ (दूतावासबाट २ घण्टाको दूरी) मा भएको उक्त दुर्घटनामा जमिनमा गहिरो गरी खन्ने क्रममा माथिबाट बालुवाको ढिस्को झरेर १५ भन्दा बढी कामदार च्यापिएको र जसमा १३ जना नेपाली परेको सोहि कम्पनीमा काम गर्र्ने अन्य नेपाली कामदारले बताएका छन् ।

१३ जना नेपालीमा ४ जनाको मृत्यु भइसकेको भन्ने समाचार आएपनि कुवेतस्थित नेपाली दूतावासले त्यसलाई पुष्टि नगरिसकेको एनआरएनए कुवेतका महासचिव दिल पाख्रिनले संसारन्युजलाई बताएका छन् ।

यता दूतावासका द्धितीय सचिव मनोज सिंहसँग दुर्घटनाका बारेमा टेलिफोनमा कुरा गर्दा त्यसमै लागिरहेको र केही समयमा सम्पूर्ण अपडेट गराउने संसारन्युजलाई बताएका छन् ।

मंगलबार दिउँसो २-३ बजेतिर भएको उक्त दुर्घटनामा जमिनमा खन्दै जाँदा ठूलो ढुंगा भेटिएको र त्यहि ढुंगालाई बमले ब्लाष्ट गर्ने समयमा जमिन फाटेर उक्त दुर्घटना भएको थियो । दुर्घटनामा परेकाहरुलाई मंगलबार रातिसम्म केही उद्धार गरेपनि केही बाँकी रहेको र उनीहरुको जिवितै उद्धार गर्न सकिने सम्भावना रहेको पनि पाख्रिनले बताएका छन् ।

सोहि ठाउँमा अन्य नेपाली पनि कार्यरत रहेकाले १३ जना नेपाली परेको उनीहरुले बताएका हुन् । तर, उद्धारकै क्रममा रहेकोले कुवेतको प्रशासनले यति जनाको मृत्यु र यति घाईते भन्ने अहिले सम्म खुलाएको छैन । ‘सम्भवत आज बेलुका सबै तथ्य बाहिर आउँछ ।’ महासचिव पाख्रिनले भने ।

मंगलबार बेलुका सम्म ६ जनाको शब निकालिएको र ३ जनाको सकुशल उद्धार गरिएको त्यहाँ कार्यरत नेपालीले बताए पनि मृत्यु भएका तथा जिवितै उद्धार गरिएका नागरिक कहाँका हुन् भनेर खुलाइएको छैन । घटनास्थलमा प्रहरी डाक्टर बाहेक अन्य कसैलाई पनि जान नदिएको बताइएको छ ।

अरब टाइम्सले ४ नेपालीको मृत्यु भएको भनेर समाचारमा जनाए पनि उनीहरुको परिचय आइसकेको छैन ।

कुवेतको एक निर्माणस्थलमा पुरिएर चार नेपाली कामदारको मृत्यु, तीन घाईते