हामी सबैकाे संसारन्यूज

सरकारले प्रहरी कर्मचारीलाई नेपाल प्रहरी तथा प्रदेश प्रहरीमा समायोजन गर्ने कार्य अघि बढाउने भएको छ । प्रहरी कर्मचारीलाई नेपाल प्रहरी तथा प्रदेश प्रहरीमा समायोजन गर्ने सम्वन्धमा व्यवस्था गर्न बनेको विधेयक पारित भएसँगै  गृहमन्त्रालयले त्यसका लागि गृहकार्य सुरु गरिसकेको छ ।

माघ २८ गते राष्ट्रपतिबाट प्रमाणीकरण भएसँगै ऐनको रुपमा कार्यान्वयनमा आएको उक्त विधेयकमा प्रदेश प्रहरी प्रमुखमा नायब महानिरीक्षकलाई खटाइने जनाइएको छ । प्रदेश प्रहरी प्रमुख संघीय सरकार मातहत रहने गरी व्यवस्था गरिएको छ । अन्य सबै प्रहरीहरुको भने सरुवा बढुवा प्रदेश सरकार मातहत नै हुने उल्लेख छ । प्रत्येक प्रदेशमा खटिने प्रहरीलाई प्रदेश सभाले बनाउने कानुनबमोजिम प्रदेशको सम्वन्धित अधिकारीले प्रदेशभित्र सरुवा गर्नेछन् ।

तीन महिनाभित्र नेपाल प्रहरीलाई प्रदेशमा समायोजन गरिँदै

गृहमन्त्रालये यो ऐन प्रारम्भ भएको मितिले तीस दिनभित्र प्रहरी कर्मचारी समायोजन गर्ने प्रयोजनको लागि प्रहरी कर्मचारीको वववरण तयार गरिने जनाइएको छ ।

समायोजनको लागि मन्त्रालयले ऐन बमोजिम प्रहरी कर्मचारीलाई प्रदेश प्रहरीमा समायोजनका लागि प्रत्येक प्रदेशमा समायोजना गरिने प्रहरी नायब उपरीक्षक वा सोभन्दा मुनिका पद, दर्जा र त्यसको संख्या सहितको विवरण खुलाई समायोजनको लागि प्रहरी कर्मचारीबाट निवेदन आह्वान गरी सूचना प्रकाशित गरिने उल्लेख छ । विधेयकमा प्रदेशको प्रहरी समायोजन गर्ने विषयमा समिति बनाइने उल्लेख छ ।

यसरी समायोजन गर्दा विभिन्न विषयलाई आधार तोकेको छ । जसअनुसार उमेरको ज्येष्ठताको आधारमा प्रदेश अन्तर्गत समायोजन गरिने तथा हालको स्थायी ठेगाना भएको प्रदेश अनुसार नै खटाइने उल्लेख छ । यसरी समायोजन भएको प्रहरी कर्मचारी १५ दिन भित्र खटाइएको प्रदेशमा हाजिर हुनु पर्नेछ ।

प्रदेशमा प्रहरीको समायोजन गर्दा प्रहरी कर्मचारीको छनोटको आधारमा सम्भव भएसम्म पतिपत्नीलाई एकै प्रदेशमा पर्ने गरी समायोजन गरिने जनाइएको छ ।

हेर्नुस प्रहरी कर्मचारीलाई नेपाल प्रहरी तथा प्रदेश प्रहरीमा समायोजन गर्ने सम्बन्धमा व्यवस्था गर्न बनेको विधेयक