हामी सबैकाे संसारन्यूज

१३ फागुन, काठमाडौँ । सुरक्षाकर्मी र अन्य सरकारी कर्मचारीको निवृत्तिभरण (पेन्सन) पाउने सेवा अवधिमा अझै एकरुपता कायम हुन सकेको छैन ।

निजामति, सेना , प्रहरी, सशस्त्र प्रहरी र शिक्षण पेसामा आबद्ध कर्मचारीले कति वर्ष सेवा गरेपछि पेन्सन पाउने व्यवस्था सरकारी निकायपिच्छे फारफरक छ । प्रहरी र सशस्त्रमा २०६० चैत २६ गतेभन्दा अघि सेवा प्रवेश गरेका नायब निरीक्षक र सहायक निरीक्षक –कनिष्ठ अधिकृत) ले १८ वर्ष र कार्यालय सहयोगी, सिपाही र हवल्दारले १६ वर्षमै राजीनामा दिएर पेन्सनमा जान सक्ने प्रावधान छ ।

सेनाले पेन्सन पाउने व्यवस्था २० वर्षबाट घटाई १६ वर्ष कायम गर्न हालै रक्षा मन्त्रालयमा प्रस्ताव पठाइसकेको छ । सैनिक नियमावलीअनुसार २०६० वैशाख २८ भन्दा पछि भर्ना हुने जुनसुकै सैनिकले २० वर्ष सेवा अवधि पूरा गरेपछि पेन्सन पाउने व्यवस्था छ ।

तर त्यसअघि सेनामा भर्ना हुने सहायक सेनानी र सोभन्दा माथि महारथी (प्रधानसेनापति) सम्म २० वर्ष, जमदार, सुवेदार र प्रमुख सुवेदारसम्म १७ वर्ष तथा फलोअर्सदेखि हुद्दासम्मले १६ वर्ष सेवा अवधि पूरा गरेपछि पेन्सन पाउने उल्लेख छ । मंगलबारको कान्तिपुर दैनिक पत्रिकाबाट