Sansar News
१४ फागुन, काठमाडौं । नेपाल कम्युनिस्ट पार्टी (नेकपा)भित्रको विवाद सतहमै देखिएको छ । प्रधानमन्त्री तथा नेकपा अध्यक्ष केपी शर्मा ओलीले राष्ट्रियसभा सदस्यमा वामदेव गौतमलाई सिफारिस नगर्ने बताएसँगै नेकपामा ठूलै अन्तरद्धन्द्ध चर्किएको अनुमान लगाउन सकिन्छ ।
मन्त्रिपरिषद्को सिफारिसमा राष्ट्रपतिले मनोनीत गर्ने राष्ट्रियसभा सदस्यमा वामदेव गौतमलाई लैजाने बुधबार बसेको सचिवालय बैठकको निर्णय गरेको थियो । तर सचिवालयको निर्णयलगत्तै आफ्ना विरुद्ध ‘खेल’ भएको भन्दै ओलीले उक्त निर्णय नमान्ने बताएका हुन् ।
सचिवालयका केही नेतालाई फोन गरेर ओलीले वामदेवलाई राष्ट्रियसभामा सिफारिस नगर्ने चेतावनी दिएको स्रोतले बतायो । बुधबार बसेको सचिवालय बैठकमा वामदेवलाई राष्ट्रियसभा सदस्यमा मनोनीत गरौं भन्दा ओलीले मौन सहमति जनाएका थिए ।
सचिवालयमा निर्णय लेखिएको मसी सुक्न नपाउँदै ओलीले आफूविरुद्ध खेल भएको भन्दै गौतमलाई राष्ट्रियसभामा सिफारिस नगर्ने बताउनुलाई अर्थपूर्ण रुपमा हेरिएको छ ।
वि.सं.२०७६ फागुन १४ बुधवार १६:२९ मा प्रकाशित
