हामी सबैकाे संसारन्यूज

१६ फागुन, काठमाडौं । जापानबाट कोरोना भाइरस संक्रमित पानी जहाजमा रहेका ११९ जना नागरिकसहित उद्धार गरिएकी काठमाण्डौंकी महिला भएको बताइएको छ ।

उक्त पानी जहाजमा क्रु मेम्बर रहेकी कपनकी अम्बिका बस्नेतको भारतीय नागरिकसँगै उद्धार गरिएको नेपाली दूतावास दिल्लीले जनाएको छ ।

भारतले बुधबार कोरोना भाइरस सक्रमण देखिएको डायमण्ड प्रिन्सेस जहाजमा रहेका आफ्ना नागरिकहरुको उद्धारका लागि एअर इन्डियाको विशेष विमान त्यसतर्फ पठाएको थियो । उक्त जहाजले पाँच जना विदेशी नागरिक र ११९ जना भारतिय यात्रु लिएर बिहीबार बिहान दिल्लीको इन्दिरा गान्धी विमानस्थलमा ओर्लेको थियो । उद्धार गरिएका पाँचजना विदेशीमा दुई जना श्रीलंकाली र एक नेपाल, दक्षिण अफ्रिका र पेरुका एक–एक जना नागरिक रहेको भारतीय विदेशमन्त्री एस जयशंकरले जनाएका थिए ।

दिल्ली ल्याइएका भारतीयमध्ये ११३ जना पानीजहाजका चालक दलका सदस्य र ६ जना यात्रु रहेको बताइएको छ ।

चार फेब्रअरीमा पहिलो पटक उक्त जहाजमा रहेको दश जनामा कोरोना भाइरसको संक्रमण भएको खुलेको थियो । तर, समयमै ती संक्रमितहरुको उद्धार नहुँदा जहाजमा यात्रा गरिरहेका ३७ सय यात्रुमध्ये ७ सय जनामा कोरोनाको संक्रमण देखिएको बताइएको छ । उक्त जहाजमा यात्रा गरिरहेका चारजनाको मृत्यु भइसकेको छ ।

उद्धार गरेर ल्याइएका हरुलाई कोरोना भाइरस संक्रमण भएको नभएको पत्ता लगाउन भारतको हरियाणास्थित मानेसरस्थित सैनिक क्याम्पमा १४ दिनको क्वारेन्टाइनमा राखिएको बताइएको छ ।

कोरोना संक्रमित पानीजहाजबाट आफ्ना नागरिकसहित एक नेपालीको पनि उद्धार गर्‍यो भारतले