हामी सबैकाे संसारन्यूज

२१ फागुन, काठमाण्डौं । काभ्रेको चौरी देउरालीमा भएको बस दुर्घटनामा ३० जना घाईते भएका छन् ।

घाईते मध्ये ६ जना गम्भीर रहेको पनि काभ्रे जिल्ला प्रहरी कार्यालय काभ्रेले बताएको छ । घाईतेहरुलाई उपचारका लागि धुलिखेल ल्याइएको पनि प्रहरीले जनाएको छ ।

बिहान रामेछापको गुराँसेबाट ४४ यात्रु बोकेर काठमाण्डौंका लागि छुटेको बा ४ ख ७१०२ नम्बरको बस काभ्रेको चौरी देउराली गाउँपालिकाको ढाडखर्कमा सवा दशबजे दुर्घटना भएको थियो ।

वसमा सवार यात्रुका अनुसार अर्को गाडीलाई साइडदिने क्रममा उक्त दुर्घटना भएको बताइएको छ ।

ड्राइभरले पहिलेदेखि अनियन्त्रित गाडी चलाएको र सम्झाउँदा पनि नमानेको सोहि बसमा सवार चौरी देउराली गाउँपालिकाकी कृषि प्रमुख अन्जना चौलागाईले संसारन्युजलाई बताएकी छन् ।

‘हामीले पहिले भनेका थियौं, भाइ विस्तारै चलाउ गाडी, यतिधेरैको जीवन बोकेर हिँडेका छौ भनेर । अन्य यात्रुले पनि राम्रोसँग चलाउन आग्रह गरेका थिए, म चौरी देउराली गाउँपालिका जानका लागि झर्नुपनि त्यसको एक मिनेटमै गाडी दुर्घटना भयो,’ उनले भनिन्, ‘छतमा पनि ६–७ जना रहनु भएको थियो । उहाँहरु पनि हाम फाल्नु भयो । अन्य धेरै घाईते छन् । हामीले उद्धार गरेर धुलिखेल अस्पतालमा पठाएका छौं ।’
रुखले छेकिएका कारण बस भिरमा खस्न नपाएको पनि चौलागाईँले बताइन् ।

विस्तृत विवरण आउन बाँकी