Sansar News
प्रधानमन्त्री केपी शर्मा ओलीको मिर्गौला प्रत्यारोपणका लागि अप्रेशन जारी छ। त्रिवि शिक्षण अस्पतालमा बिहान साढे १० बजेदेखि जारी प्रत्यारोपणका क्रममा चिकित्सकहरुले अंगदाता समीक्षा संग्रौलाको शल्यक्रिया सकेका छन्। शल्यक्रिया गरेर समीक्षाको शरीरबाट देव्रे मिर्गौला निकालिएको छ।
अब प्रधानमन्त्रीको शरीरमा उक्त मिर्गौला प्रत्यारोपण गरिनेछ। ‘शल्यक्रिया गरेर समीक्षाको देब्रे मिर्गौला निकालिएको छ’, एक चिकित्सकले भने, ‘अबको डेढ घण्टासम्ममा प्रधानमन्त्रीको शरीरमा उक्त मिर्गौला प्रत्यारोपण गरिसक्छौं।’ मिर्गौला प्रत्यारोपण पूरा भइसकेपछि करिब २ घण्टाको अवधिमा प्रधानमन्त्री ओलीको होस खुल्ने चिकित्सकहरुले बताएका छन्।
प्रधानमन्त्रीको मिर्गौला शल्यक्रिया जारी रहँदा त्रिवि शिक्षण अस्पतालमा सयौँको संख्यामा शुभचिन्तकहरु जम्मा भएका छन्। १२ वर्षअघि भारतमा पहिलो पटक ओलीले मिर्गौला प्रत्यारोपण गराएका थिए । यससँगै ओलीको शरीरमा प्रत्यारोपण गरिएको मिर्गौलासहित तीन मिर्गौला थिए । आज मिर्गौला प्रत्यारोपण गरिएसँगै उनको शरीरमा चार वटा मिर्गौला हुनेछ ।
अहिले ओलीको शरीरमा प्रत्यारोपित एउटा मिर्गौलासहित तीनवटा मिर्गौला छन् । प्राडा प्रेमराज ज्ञवालीका अनुसार आजको प्रत्यारोपणपछि ओलीको शरीरमा चारवटा मिर्गौला हुनेछन् ।
वि.सं.२०७६ फागुन २१ बुधवार १४:३३ मा प्रकाशित
