हामी सबैकाे संसारन्यूज

काठमाडौँ । चलचित्र विकास बोर्डका अध्यक्ष तथा कलाकार स्वर्गीय केशव भट्टराइको परिवारलाई अहिले विभिन्न फिल्मकर्मीहरुले सहयोग गरिरहेका छन् ।
गत मंसिर ३० गते हृदयघातका कारण निधन भएका भट्टराइको परिवार आर्थिक समस्यामा रहेको खबर बाहिरिएसँगै यतिबेला फिल्मकर्मीहरुले आर्थिक सहयोग गरिरहेका छन् । स्वर्गिय भट्टराइको निधनपछि उनको परिवारमाथि आइपरेको आर्थिक पीडालाई कम गर्न समिति समेत गठन भैसकेको छ ।
हालै अभिनेत्री करिश्मा मानन्धरले होली मनाउने खर्च १ लाख १ सय १ रुपैयाँ स्वर्गीय भट्टराईको परिवारलाई हस्तान्तरण गरेकी थिइन् । त्यस्तै, अहिले अमेरिकामा बस्दै आएका फिल्मकर्मी तथा निर्देशकहरुले पनि भट्टराईको परिवारलाई राहत स्वरूप आर्थिक सहयोग अभियान चलाएका छन् । उनीहरुले १ लाख २६ हजार ५ रुपैयाँ चलचित्र निर्देशक समाजमार्फत स्व. भट्टराइको परिवारलाई सहयोग गरेका हुन् ।

नेपाली फिल्मका निर्देशकहरु नारायण पुरी, गोपाल चन्द्र लाम्छाने, दिनेश कार्की, किशोर सुब्बा, अक्की शर्मा, यादब सिलवाल, बीबी फुँयाल र सुमन दाहालमार्फत् आएको उक्त रकम हस्तान्तरण गरिएको हो । यो रकम स्व। भट्टराईकी पत्नीलाई प्रदान गरिने जानकारी समितिले गराएको छ । त्यस्तै, अमेरिकामा बस्ने अन्य फिल्मकर्मीहरुबाट पनि ९ लाख रुपैयाँ संकलन भैसकेको छ ।