हामी सबैकाे संसारन्यूज

फाइल तस्विर

२८ फागुन, काठमाडौं । कांग्रेस सभापति शेरबहादुर देउवाका पछिल्ला निर्णयप्रति असन्तुष्ट जनाउँदै आएको वरिष्ठ नेता रामचन्द्र पौडेल पक्षले कांग्रेस केन्द्रीय कार्यलयमै बैठक गरेको छ । यसअघि आफूनिकट नेताहरुको घरमा जमघट हुँदै आएको पौडेल पक्षले बुधबार भने पार्टी केन्द्रीय कार्यलयमै बैठक गरेको हो ।

सभापतिले पश्चिम नवलपरासीका कार्यवाहक सभापति अर्जुन पोखरेललाई हटाएकोप्रति पौडेल पक्षले आपत्ति जनाएको छ। पौडेल पक्षका नेताहरुको बैठकले उक्त विषयमा सभापतिसँग कुरा गर्ने जिम्मा महामन्त्री डा शशाङ्क कोइरालालाई दिएको छ। सभापति देउवाले नवलपरासी कार्यवाहक सभापतिलाई हटाएर आफूनिकट विष्णु पौडेललाई जिम्मेवारी दिएका थिए।

देउवाको उक्त कदमका विषयमा छलफल गर्न केन्द्रीय कार्यालयमा बैठक बसेको थियो। सभापति देउवाले महामन्त्रीनिकट जिल्ला सभापति हटाएर आफू नजिकका पौडेललाई कार्यवाहक जिल्ला सभापति बनाएका थिए।

महाधिवेशन प्रतिनिधि नभएको व्यक्ति सभापति हुन नसक्ने विधानअनुसार कार्यवाहक जिल्ला सभापति हटाइएको संस्थापन पक्षले जनाएको छ।