Sansar News
२८ फागुन, काठमाण्डौं । पूर्वस्थानीयमन्त्री तथा नेपाली कांग्रेसका नेता पूर्णकुमार शेर्माको निधन भएको छ ।
शेर्माको बुधबार दिउँसो काठमाण्डौंको निदान अस्पतालमा उपचारका क्रममा मृत्यु भएको बताइएको छ ।
दुवै मिर्गौलाले काम गर्न छाडेपछि लामो समयदेखि थलिएका शेर्मा पाँचथर क्षेत्र नं १ बाट पूर्व सभासद् समेत रहेका थिए ।
२०२५ सालमा नेपाली कांग्रेसको सदस्यता लिएका शेर्मा गाउँफर्क राष्ट्रिय अभियानको अन्चल सदस्य समेत रहेका थिए । राजनीतिक संघर्षका क्रममा पटक–पटक जेलजीवन समेत भोगेका शेर्माका दुई छोरा र पाँच छोरी रहेको बताइएको छ ।
शेर्माको मृत्युमा दुःख व्यक्त गर्दै नेपाली कांग्रेसका नेता डा. चन्द्र भण्डारीले नेपालले एक होनहार आर्दश नेता गुमाएको बताएका छन् ।
‘नेपालले एक होनाहार आर्दश व्यक्तित्व गुमाएको छ । नेपाली काग्रेस पाँचथरका पूर्वपार्टी सभापति, पूर्व केन्द्रीय सदस्य तथा पूर्वस्थानीय विकासमन्त्री रहिसक्नु भएका पूर्णकुमार शेर्माको निधनले स्तब्ध वनाएकोछ । उहाँ नेपाली राजनीतिका एक आदर्श पुरुष हुनुहुन्थ्यो ।सरल र इमानदार एक नेतालाई भावपूर्ण श्रद्धांजलि साथै सम्पूर्ण परिवारमा समवेदना ।’ नेता भण्डारीले दुःख व्यक्त गर्दै भनेका छन् ।
वि.सं.२०७६ फागुन २८ बुधवार २१:४९ मा प्रकाशित
