हामी सबैकाे संसारन्यूज

५ चैत, काठमाण्डौं । कोरोना भाइरस रोकथाम तथा नियन्त्रण उच्चस्तरीय समितिको बुधबार बसेको बैठकले एसईई लगायतका विभिन्न महत्वपूर्ण निर्णयहरु गरेको छ ।

समितिका संयोजक, उपप्रधानमन्त्री तथा रक्षामन्त्रीको अध्यक्षतामा बसेको बैठकले विहिबारदेखि सुरु हुने एसईई को परीक्षा स्थगीत गर्ने निर्णयसँगै अन्य महत्वपूर्ण निर्णय गरेको हो ।

बैठकले सि.टिई.भि.टि र विश्वविद्यालय तहका सम्पूर्ण परीक्षाहरु अर्को सूचना नभएसम्मका लागि स्थगित गने निर्णय गरेको छ ।
त्यसैगरी सरकारी, समुदायिक तथा निजि क्षेत्रबाट सञ्चालित सबै प्रकारका बालबिकास केन्द्रहरु, आधारभुूत तथा माध्यमीक विद्यालयहरु, शैक्षिक प्रतिष्ठानहरु र विश्वविद्यायलहरुको पठनपाठन २०७६ चैत मसान्तसम्म बन्द गर्ने निर्णय गरेको छ ।

त्यसैगरी सरकारी, सामुदायिक तथा निजी क्षेत्रका तालिम केन्द्र तथा प्रतिष्ठानहरु एवं निजी क्षेत्रका शैक्षिक परामर्श केन्द्रहरुबाट सन्चालित कार्यक्रमहरु २०७६ चैत मसान्तसम्मका लागि बन्द गर्ने निर्णय गरिएको छ । साथै अन्तराष्ट्रिय तथा राष्ट्रिय गैरसकारी संस्थाहरुबाट सन्चालन हुने सबै प्रकारका तालिम, सेमिनार, गोष्ठि, सभा, सम्मेलन जस्ता कार्यक्रमहरु २०७६ चैत मसान्तसम्मका लागि बन्द गर्ने निर्णय गरिएको पनि शिक्षा, विज्ञान तथा प्रविधि मन्त्रालयले जनाएको छ । तस्बिर रासस