हामी सबैकाे संसारन्यूज

८ चैत्र, काठमाडौँ । यतिबेला हाम्रो देशमात्र होइन विश्व नै संक्रमणमा छ । यो संक्रमणमा सबै मिलि सहयोगी हात जुटाउन आवश्यक छ । सुनिन्छ, धन हुनेको मन हुँदैन, मन हुनेको धन हुँदैन । तर कोही कोही भने धन र मनका दुवै धनिहरु भेटिन्छन् । यस्तै उदाहरणीय व्यक्ति भनेका छन्, हरिहर लामिछाने ।

१७ मार्चका दिन उनले फेसबुकको स्टाटस लेख्दै आफूले ३ महिनासम्मको घरभाडा नलिने जानकारी गराएका छन् । उनले लेखेका छन् ‘मेरो घरमा भाडा बस्ने हरूलाई चैत्र १ गतेबाट ३ महिना सम्म भाडा छुट गर्ने निर्णय गरियो ।’

मकवानपुरको थाहा नगरपालिका स्थित चित्लाङ स्थायी घर भएका हरिहर लामिछानेले काठमाडौंको कलंकीमा भएको घरको चार वटा कोठामा बस्ने चार परिवारलाई तीन महिनाको कोठा भाडा नलिने घोषणा गरेका हुन् ।

देश संकटमा परेका बेला कोठा भाडामा बस्नेहरुलाई केही राहत होस् भनेर आफूले यस्तो घोषणा गरेको उनी बताउँछन् ।

यो दुःखको बेलामा सबैले आफ्नो तर्फबाट थोरै भएपनि सहयोग गर्न सकियो भने सबै नेपालीलाई सहयोग पुग्ने उनको विचार छ । परोपकारी कर्म आफूले बाबुबाट सिकेको उनी बताउँछन् । उनी भन्छन् ‘बुबाको परोपकारी कर्मले मलाई पनि उहाँकै बाटोमा हिड्ने प्रेरणा दिइरहेको छ ।’