हामी सबैकाे संसारन्यूज

२३ चैत, अष्ट्रेलिया । गैरआवासीय नेपाली संघ राष्ट्रिय समन्वय परिषद (एनआरएनए एनसीसी) अष्ट्रेलियाले कोभिड १९ बाट प्रभावितहरुको राहतको लागि अनलाइन फर्मको ब्यवस्थासहित विभिन्न उदाहरणीय कार्यका लागि जुटेको छ ।

एनसीसी अष्ट्रेलियाले कोरोना संक्रमणको समयमा राहत निर्माण समिति गठन समेत गरेको छ । उक्त समितिमा नेपाली दूतावास अष्ट्रेलिया संरक्षक र एनसीसी अष्ट्रेलियाका अध्यक्ष संयोजक रहेका छन् भने १५ वटा स्थानीय संघसंस्था उपसंयोजक तथा अन्य १५० स्थानीय संघ संस्थाहरु सदस्य रहेको बताइएको छ ।

समितिले संक्रमणबाट प्रभावित भएका व्यक्तिहरुको सहयोगका लागि अनलाइन फर्मको ब्यबस्था गरेको हो । जसमा हाल सम्म ८०० जनाको सहयोगका निम्ति आवेदन प्राप्त भएको संघले जनाएको छ । ती मध्ये २०० जनालाई प्रतिव्यक्ति ४० डलरका दरले एक हप्तालाई पुग्ने खाना आपूर्ति गरिएको कुरा एनआरएनए एनसीसी अष्ट्रेलियाले जानकारी दिएको छ । यसमा अन्यलाई पनि समेटिँदै जाने पनि बताइएको छ ।

यसैगरी संघले २० हजार डलरको राहत कोष स्थापना समेत गरेको जानकारी दिएको छ । यसमा रकम थप हुने क्रम जारि रहको र २० हजार डलर तुरुन्तै थपिँदै गरेको बताइएको छ ।

संघले यसबाहेक नेपालमा पीपीई लगायत अत्यावश्यक सामग्री पठाउनको लागि रु ५ लाख अन्तर्रा्ष्ट्रिय समन्वय परिषदको राहत कोषमा योगदान समेत गरेको पनि संघका सूचना तथा संचार उपसंयोजक कृष्ण के सीले जानकारी दिएका छन् ।