Sansar News
२७ चैत्र, काठमाडौँ । आज दिनभर सरकारले प्रहरीको एक महिनाको तलब काट्ने निर्णय गरेको समाचारले सनसनी फैलियो ।
यसबारेमा निकै टिकाटिप्पणी भए । कोरोना नियन्त्रणका लागि अग्रपंक्तिमा खटिएका प्रहरीहरुको तलब काटिने समाचार आएपछि धेरैले सरकारको निर्णय फिर्ता गरिनुपर्दछ भनेर माग पनि गरे ।
राजनीतिक दलका नेता देखि बुज्रुक नागरिकबाट समेत सरकारको निकै आलोचना भयो । तर वास्तविकतामा एक महिनाको तलबबाट प्रहरी महानिरिक्षकको ७ दिनको तलब र असईको ३ दिनको तलब एकमुष्ट संकलन गरी सरकारी राहत कोषमा जम्मा गर्ने भनि प्रहरी प्रधान कार्यालयले निर्णय गरेको पाइएको छ ।
तर प्रहरी हवलदार, सिपाही र अन्य परिचरहरुको बारेमा भने लेखिएको छैन । यसले दिनभरी प्रहरी जवानहरुलाई टेन्सन बनायो र सामाजिक सञ्जाललाई उत्तेजित पनि बनायो । प्रसासनविद्हरु भन्छन् ‘यो बेला खटिने प्रहरीहरुलाई अधिक भत्ताको व्यवस्था गरिनु पर्दछ र सहयोग चाहिँ स्वेच्छिक हुनुपर्दछ ।’
यससम्बन्धमा बुझ्न खोज्दा सहप्रवक्ता तथा सूचना अधिकारी एसएसपी उमेशराज जोशीको टेलिफोनमा सम्पर्क हुन सकेको छैन ।
वि.सं.२०७६ चैत २७ बिहीवार २०:१७ मा प्रकाशित
