हामी सबैकाे संसारन्यूज

२९ चैत, झापा ।  नेपाल सहित विश्वभर कोरोना भाइरसको प्रभाव फैलिरहेको छ, त्यसको नियन्त्रणका लागि अनेकन प्रयासहरु भईरहेका पनि छन् । यस बेला डाक्टर, नर्स सहितका स्वास्थ्यकर्मीको भूमिका ज्यादै महत्वपूर्ण सावित भईरहेको छ ।

अर्कोतर्फ चैत्र ११ गतेदेखि सरकारले गरेको लकडाउनका कारण देशै ठप्प भएपछि दैनिक ज्याला मजदुरी गर्ने अतिविपन्न नागरिकलाई पेट भर्न समस्या परेको छ । नागरिकले खान पाउने हकलाई सुरक्षित गर्न यतिवेला राज्यले स्थानीय तहमार्फत अतिविपन्न नागरिकलाई पेट भर्न खाद्यान्य उपलब्ध गराउँदै छ । कोरोनाको सन्त्रास फैलिरहँदा अतिविपन्न नागरिक छनौट गर्ने कुरा र उनीहरुलाई खाद्यान्य उपलब्ध गराउने कुरा पनि चुनौतिपूर्ण बन्दै गएको छ ।

प्रत्येक वडाका वडा सदस्यहरु यतिवेला अतिविपन्न नागरिकको नाम छनौट गर्न र खाद्यान्य उपलब्ध गराउने कुरामा दिनरात लागिपरेका छन् । सामान्य मास्कको भरमा हरेकसँग सम्पर्कमा रहनुपर्ने भएकाले देशैभरका वडासदस्य ठूलो जोखिममा परेका छन् । अधिकाशं वडासदस्यले सावधानीका साधन प्रयोग गर्न नै पाएका छैनन् । असुरक्षित भएर हरेकसँग सम्पर्कमा जानुपर्ने हुँदा उनीहरु असुरक्षित मात्र छैनन् उनीहरुका कारण हरेक नागरिक पनि असुरक्षित बन्दै गएका छन् ।

विश्वमा भईरहेको कोरोना फैलावटको अवस्थालाई हेर्ने हो भने नेपालमा चुनौती विस्तारै थपिन सक्ने संम्भावना अझै टरेको छैन । अवस्था जटिल बन्दै गयो भने हरेक नागरिकसँग प्रत्यक्ष सम्पर्कमा रहने स्थानीय तहका जनप्रतिनिधिलाई ठूलो समस्या निम्तन सक्ने खतरा देखिएको छ । सुरक्षा र सावधानीका साधन स्थानीय तहमा प्रर्याप्त व्यवस्थापन गर्न बेलैमा सम्बन्धित निकायको ध्यान नपुग्ने हो भने समस्या अझ विकराल बन्न सक्ने खतरा टरेकै छैन ।

अतिविपन्न नागरिकको चुल्हो बल्नेकुरामा उनीहरुको भूमिका पनि उत्तिनै महत्व पूर्ण सावित भईरहेको छ । वडा सदस्यको भूमिका कमदेखियो भन्ने आरोप खेपिरहेका वडासदस्यहरु यतिवेला आफ्नो भूमिका सावित गर्ने कुरामा लागेका पनि छन् ।

अतिविपन्न नागरिकको तथ्याङ्क संकलन गर्ने अन्य जनप्रतिनिधि, तथ्याङ्क संकलन र राहत वितरणका लागि गठन गरेको समितिका अन्य सदस्यहरु पनि सामान्य मास्कको भरमा काममा खटिँदा चुनौति पनि थपिइरहेको छ ।

झापाको बुद्धशान्ति गाउँपालिका वडा नम्बर १ का वडा सदस्य टीकाप्रसाद धिमालले ‘कोरोनाले कसैलाई पनि नचिन्ने हुँदा आफूहरु सामान्य मास्कको भरमा हरेक नागरिकको घरमा पुगिरहेका छौं हामी पनि कहाँ सुरक्षित छौं र तरपनि जनताको काम गर्ने कसम खाएका हामीले जस्तो सुकै परिस्थितिमा पनि जनताका लागि काम गरिरहेका छौं, गर्ने नै छौं’ भनेका छन् ।

त्यस्तै बुद्धशान्ति–२ का वडासदस्य नेत्र गौतमले पनि सकेसम्म सावधानीका उपायहरु अपनाएरै जनतालाई खाद्यान्य बाँड्ने, अतिविपन्न नागरिकको तथ्याङ्क लिने काम गरिरहेको बताएका छन् । उनले आफूहरु पूर्ण सुरक्षित नरहेको थाहाहुँदा हुँदै पनि जनतालाई यो संक्रमण र अभावबाट बचाउन अहोरात्र खटिरहेको बताएका छन् ।

बुद्धशान्ति गाउँ कार्यपालिका सदस्य समेत रहेकी बुद्धशान्ति–३ की वडासदस्य भगवती शर्मा खतिवडाले यहीँ उत्पादन भएका मास्क, सिमित ग्लोब्स र सेनिटाइजर प्रयोग गरेर सुरक्षित हुने सावधानीहरु अपनाएर जनतालाई राहत दिने, सचेत बनाउने कार्यमा सम्पूर्ण जनप्रतिनिधि लागेको बताउँदै प्रयाप्त स्रोत साधन नहुँदा असुरक्षित महसुस भईरहेको बताउँछिन् । उनले भनिन् ‘जनताका लागि आफ्नो परवाह नगरी जनप्रतिनिधि खटिरहेका छौं ।’

त्यस्तै कार्यपालिका सदस्य समेत रहेकी बुद्धशान्ति ४ की वडा सदस्य दुर्गादेवी पोखरेलले पनि आफ्नो जिम्मेवारी पूरा गर्न लागिपरेको बताइन् । सुरक्षाका सामान्य सामग्रीहरुकै भरमा दैनिक रुपमा खटिरहेको उनले बताइन् । उता बुद्धशान्ति–५ का वडासदस्य डेगेन्द्र कार्कीले कोरोनाको संक्रमणसँग कोहि पनि सुरक्षित नरहेको बताएका छन् । जनताको काम गर्न सामान्य सावधानी अपनाउँदै आफूहरु खटिरहेको उनले बताए ।

त्यस्तै बुद्धशान्ति-६ का वडासदस्य लेखनाथ निरौलाले ‘जहाँसम्म सुरक्षाका लागि सावधानीहरु अपनाइएको छ, तर त्यो पर्याप्त होइन भन्नेकुरा त सबैलाई थाहा भएकै कुरा हो तर पनि विपन्न नागरिकलाई खाद्यान्य वितरणमा जोडतोडका साथ लागेका छौ’ भनेका छन् ।