हामी सबैकाे संसारन्यूज

२ बैशाख, पोखरा । कोरोना भाइरसको आशंका र रोकथामका लागि क्वारेन्टाइनमा बस्ने प्रत्येक व्यक्तिलाई गण्डकी प्रदेश सरकारले दिनको ५ सय १० रुपैयाँ खर्च गर्ने भएको छ ।

प्रदेश सरकारको आइतबार बसेको मन्त्रिपरिषद्को बैठकले यस्तो निर्णय गरेको जानकारी सरकारका प्रवक्ता समेत रहेका भौतिक पूर्वाधार विकासमन्त्री रामशरण बस्नेतले दिए । ‘ बस्ने ठाउँको व्यवस्था स्थानीय तहले पनि गरेको छ, प्रदेश सरकारले पनि गरेको छ,’ उनले भने । मंगलबारको अन्नपूर्णपोष्ट दैनिकमा समाचार छ ।

प्रदेश सकरारले कोरोना रोकथामका लागि सुरक्षा सामग्री खरिद गर्न सुरक्षा निकायलाई ४५ लाख रुपैयाँ विनियोजन गरेको छ । मन्त्रिपरिषषद्को बैठकले तीनवटा सुरक्षा निकायका लागि त्यतिका रकम विनियोजन गरेको मन्त्री रामशरण बस्नेतले बताए । उक्त रकम सेनाको पृतना, नेपाल प्रहरीको प्रदेश कार्यालय र सशस्त्र प्रहरी बल मुक्तिनाथ बाहिनी पोखरालाई १५÷१५ लाख रुपैयाँका दरले उपलब्ध गराइने मन्त्री बस्नेतले बताए ।

त्यस्तै डेडिकेटेड अस्पतालमा काम गर्ने चिकित्सक, स्वास्थ्यकर्मी र प्रयोगशालामा काम गर्ने प्राविधिक एवं अन्य कर्मचारीका निम्ति दिनको बढीमा २२ सय ५० रुपैयाँका दरले खर्च गर्न सीमा तोक्ने निर्णय पनि मन्त्रिपरिषद्ले गरेको छ । यो रकम खाने, बस्ने र खाजाको लागि हो ।