हामी सबैकाे संसारन्यूज

२ वैशाख । विश्वमै माहामारीका रुपमा फैलिरहेको कोरोना भाइरसको रोकथामका लागि अहिले सम्म कुनै औषधि नभएको बताइरहेका बेला बेलारुसका राष्ट्रपतिले भने नशालु पेय पदार्थ (भोडका)लाई कोरोना भाइरसको दबाई भएको दाबा गरेका छन् ।

भारतीय एक संचारमाध्यमले राष्ट्रपति अलेक्ज्याण्डर लुकाशेन्कोले सो दाबी गरेको भन्दै समाचार बनाएको छ । समाचारमा जनाइएअनुसार राष्ट्रपति अलेक्ज्याण्डर भनेका छन्, ‘उनको देशमा कोरोनाबाट कोही पनि मरेन र कोही पनि मर्दैन ।’ यद्यपि बेलारुसमा आधिकारिक रूपमा कोरोना भाइरसबाट हुने मृत्युको संख्या दुई दर्जन भन्दा बढी छ ।

यति मात्र होइन उनले यो रोग भोडका पिएर, ट्याक्टर चलाएर, बाख्रासँग खेलेर निको हुने समेत बताउने गरेका छन् । बेलायती मिडियाहरु अलेक्ज्याण्डरलाई तानाशाह मान्ने गरेको बताइएको छ ।

डाक्टर तथा मानवअधिकारकर्मीहरूले अलेक्ज्याण्डरले भाइरसलाई गम्भीरतासाथ नलिएको आरोप लगाएका छन् । उनीहरुले चेतावनी दिँदै भनेका छन् ‘केही दिनमै धेरै मानिसहरू यसबाट मर्दैछन् ।’

राष्ट्रपति अलेक्ज्याण्डरले लकडाउन गर्न इन्कार गरेका छन् । उनले नागरिकलाई सम्बोधनका क्रममा भन्ने गरेका छन् ‘हामीले औषधी पत्ता लगायौँ, जसले मानिसहरुलाई कोरोनाबाट निको हुन मद्दत गर्दछ ।

६५ वर्षीय अलेक्ज्यान्डर २५ भन्दा बढी बर्षदेखि बेलारुसको सत्तामा छन् । यद्यपि उनले कोरोना रोगलाई निको पार्न कुन औषधिको बारेमा कुरा गरिरहेका छने भनेर विस्तृत वर्णन भने नगरेको बताइएको छ ।

उनले आफ्ना नागरिकहरु नडराउन भनेर यस्तो सान्त्वना दिने गरेको अनुमान गर्न सकिन्छ । त्यसकारण उनी आफ्ना नागरिकलाई कोरोना भाइरसको डर भगाउन त्यसलाई हल्का रुपमा लिएर हल्का रुपमा प्रस्तुत हुने गरेको देखिन्छ ।

कोरोनाबाट मरेका मानिसहरुको मृत्युको तथ्याङ्कको सम्बन्धमा पनि राष्ट्रपतिले भन्ने गरेका छन् ‘ती व्यक्तिहरु अरु नै रोगले मरेका हुन्, जुन रोगसँग उनीहरू पहिले देखि नै संघर्र्ष गरिरहेका थिए ।’ राष्ट्रपति अलेक्ज्याण्डरलेसमेत विश्व स्वास्थ्य संगठन (डब्ल्यूएचओ) पनि आफ्नो भनाइसँग सहमत भएको दाबा गरेको पनि आजतकले लेखेको छ ।