हामी सबैकाे संसारन्यूज

६ बैशाख, काठमाण्डौं । उदयपुरको भुल्केस्थित मस्जिदमा शुक्रबार भेटिएका १२ जना  कोरोना भाइरस (कोभिड–१९) संक्रमितलाई विराटनगरको कोरोना अस्पतालको आइसोलेसनमा राखेर उपचार गरिएको छ ।

उनीहरु ११ जनामा भारतबाट आएका मुस्लिम धर्म प्रचारक र १ मोरङका नेपाली रहेको बताइएको छ । जसमा उनीहरुको सहयोगीको रुपमा रहेका अन्य ४ जना नेपालीलाई पनि क्वारेन्टाइनमा राखिएको छ ।
उदयपुरका संक्रमितहरुमा ४ जना २८ वर्षका, दुई जना २९ वर्षका छन् । त्यस्तै अरु ३४, २६, २२, २५, २० र ४० वर्षका रहेको स्वास्थ्य मन्त्रालयले जानकारी दिएको छ ।

उदयपुरमा भेटिएका संक्रमितहरुले त्यहास्थित मुस्लिम अगुवाहरुलाई पनि भेटेको, अन्य जिल्लामा पनि पुगेको बताइएको छ । शुक्रबार ती १२ जनामा कोरोना संक्रमण भेटिएपछि अहिले त्यहाँ उच्च सर्तकता अपनाइएको र उनीहरुसँग सम्पर्कमा रहेकाहरुको ट्रेसिङ कार्य तथा परीक्षणको तयारी पनि गरिरहेको बताइएको छ ।

जिल्लामै पहिलोपटक र नेपालमै यति ठूलो संख्यामा कोरोना संक्रमित भेटिएपछि स्थानीयमा थप त्रास बढेको बताइएको छ ।

बेलायतबाट आएका थिए चितवनका संक्रमित
त्यसैगरी शुक्रबार चितवनको राप्ति ८ मा भेटिएका दुईजना संक्रमितहरु बेलायतबाट आएको बताइएको छ । उनीहरु चैत ५ गते कतार ट्रान्जिट हुँदै काठमाण्डौं आएका थिए ।

उनीहरु नेपाल आएको दुईनिपछि चितवन पुगेको र ५ देखि ११ गतेसम्म थुप्रैजना परिवारका सदस्य र आफन्तहरु भेटेका उनीहरुले लकडाउनपछि मात्र घरमै बसेको बताइएको छ । संक्रमित हुनेमा एकै परिवारका ६३ वर्षीय आमा र २७ वर्षीय छोरा रहेका छन् । उनीहरुको सम्पर्कमा आएकाहरुलाई आज बिहानैदेखि ट्रेसिङ गर्ने कार्य भइरहेको र उनीहरुलाई बुद्धशान्ति कलेजको क्वारेन्टाइनमा राख्ने तयारी भइरहेको बताइएको छ । साथै उनीहरुकै परिवारका अर्का एक भाइ पनि हङकङबाट आएको र उनी पनि अस्पतालमै बसेर उपचार गराइरहेका छन् । यद्यपी उनमा कोरोना संक्रमण भने देखिएको छैन । संक्रमित २ जनाको पनि अवस्था सामान्य रहेको चितवन कोरोना अस्पतालले जनाएको छ ।

चितवन र उदयपुरमा भेटिएका १४ जना संक्रमितसहित नेपालमा कोरोना संक्रमितको संख्या ३० पुगेको छ । जसमा १ जना निको भइसकेर आफ्नो दैनिकीमा फर्किएका छन् भने अन्यको विभिन्न अस्पतालका आइसोलेनसमा उपचार भइरहेको छ भने उनीहरु सबैको स्वास्थ्य अवस्था सामान्य रहेको स्वास्थ्य मन्त्रालयले जानकारी दिएको छ ।