हामी सबैकाे संसारन्यूज

९ बैशाख, काठमाण्डौं । हावाहुरी सहित परेको चट्याङ तथा करेन्ट लागेर तीनजनाको मृत्यु भएको छ ।

धादिङ थाक्रे गाउँपालिका–३ मा विद्युतको ट्रान्समिटर पड्किँएर करेण्ट लाग्दा २ जनाको सोमबार राति मृत्यु भएको हो । मृत्यु हुनेमा सोही ठाउँ बस्ने २३ वर्षीय सागर अर्याल र ४५ वर्षीय सानोमान तामाङ रहेका छन् । अन्य ४ जना घाईते भएका छन् ।

उक्त स्थानमा रहेको ट्रान्समिटर पड्किँएर हाई भोल्टेज आएकोले आ–आफ्नै घरमा बत्ती बाल्न लाग्दा करेण्ट लागेर गम्भीर घाइते भएका उनीहरुको प्राथमिक स्वास्थ्य केन्द्र गजुरीमा उपचारको क्रममा मृत्यु भएको प्रहरीले जनाएको छ ।

करेण्ट लागेर घाइते  भएका सोही ठाउका २४ वर्षीय रुपक अर्याललाई सोही स्वास्थ केन्द्र हुँदै थप उपचारको लागि बर्न अस्पताल कीर्तिपुरतर्फ पठाइएको छ भने अन्य ३ जना उपचार पश्चात डिश्चार्ज भएका छन् ।

त्यस्तै डोटीको सायल गाउँपालिका–३ कम्छडाकी २२ वर्षीया उजली बयाडीको चट्याङ् लागेर मृत्यु भएको छ । आफ्नै घरमा बसिरहेको अवस्थामा सोमबार साँझ चट्याङमा परेर गम्भीर घाइते भएकी उनको उपचारको लागि जिल्ला अस्पताल ल्याउने तयारी गर्दागर्दै मृत्यु भएको हो ।