Sansar News
९ वैशाख, काठमाडौँ । नेपाल कम्युनिष्ट पार्टी(नेकपा)का वरिष्ठ नेता माधवकुमार नेपालले पार्टीलाई विधिका आधारमा अघि बढाउन अपिल गरेका छन् ।
नेपाल कम्युनिष्ट पार्टीको ७१ औँ स्थापना दिवसका अवसरमा नेकपाका संस्थापक महासचिव पुष्पलाल श्रेष्ठ लगायतका संस्थापक तथा शहिदहरुप्रति उच्च सम्मान व्यक्त गर्दै उनले प्रेस वक्तव्य मार्फत सो अपिल गरेका हुन् ।
‘पार्टीलाई विधिका आधारमा सहमति, समझदारी र विश्वासका साथ अघि बढाउने कुरामा आ–आफ्नो ठाउँबाट योगदान गर्न पनि म सबैलाई आग्रह गर्दछु’, वक्तव्यमा भनेका छन् ।
सोमबार विकसित घटनाप्रति इंगित गर्दै उनले एकतालाई अझ सुदृढ, दिगो र बलियो बनाउनु पर्ने गहन जिम्मेवारी आएको बताएका छन् ।
कम्युनिष्ट आन्दोलनका विगतका टुटफुट र विभाजनका नकरात्मक अनुभवबाट पाठ सिक्दै दुई वर्षअघि गरेको पार्टी एकतालाई अझ सुदृढ, दिगो र बलियो बनाउनु पर्ने नेता कार्यकर्ताको गहन जिम्मेवारी भएको बताएका छन् ।
उनले बलियो र एकताबद्ध पार्टीबाट मात्रै मुलुकको आमुल परिवर्तनको नेतृत्व गर्न र जनताले सुम्पेको जिम्मेवारी कुशलताका साथ पुरा गर्न सकिने प्रष्ट पारेका छन् ।
हाल कतिपय विकसित घटनाक्रमले पार्टी भित्र अनेकौं आशंका र चिन्ता उत्पन्न भएको पाइएको उल्लेख गर्दै उनले यस्तो अवस्थामा हामीले सिंगो पार्टी पंक्तिलाई भावनात्मक रुपले एकताबद्ध बनाउन जिम्मेवारीका साथ अघि बढ्नु पर्नेमा उनले जोड दिएका छन् ।
उनले कोभिड १९ को महामारीको विरुद्धमा सबै मिलेर लड्नु पर्ने बताउँदै उनले सरकारको नेतृत्व गरेको पार्टीको हैसियतले सिंगो राष्ट्र, पार्टीसहित अन्य पार्टीका नेता, कार्याकर्ता र जनताको ध्यान महामारीको संक्रमणका विरुद्ध लड्ने कुरामा केन्द्रीत हुन आग्रह समेत गरेका छन् ।
वि.सं.२०७७ वैशाख ९ मंगलवार १७:३७ मा प्रकाशित
