Sansar News
१० वैशाख, काठमाडौँ । नेपाल कम्युनिष्ट पार्टी(नेकपा) का वरिष्ठ नेता तथा पूर्व प्रधानमन्त्री झलनाथ खनालले अस्थिरताको विपक्षमा उत्रिन तमाम नेता कार्यकर्तालाई आग्रह गरेका छन् ।
बिबिसि नेपाली सेवाको कार्यक्रममा बोल्दै नेता खनालले पार्टी सँग कुनै छलफल नगराई र संविधानको भावनाको विचार विमर्श नगरी ल्याइएको अध्यादेश संविधान विपरित भएको बताएका छन् ।
बहुदलीय प्रणालीमा सन्तुलनको बाध्यता भन्दा टाढा पुगेर प्रधानमन्त्री ओलीले अचानक र अनाहक ४० प्रतिशतको प्रावधान ल्याएकोमा असन्तुष्टि जनाए । पार्टी र संगठनलाई पुरै बेवास्ता गरेको कारण सचिवालय बैठक बोलाइएको तर बैठक शुरु हुँदाहुँदै अध्यादेश पास भएर आइसकेकोले छलफलको औचित्यता नरहेको समेत बताए ।
प्रधानमन्त्री ओलिले ऐन ल्याए पनि नेकपा फुट्न नसक्ने बताउँदै उनले देशभरीका नेता कार्यकर्ता अस्थिरताको विपक्षमा उभिन तयार रहेको समेत बताएका छन् । उनले पार्टीको बैठकले नै ओलीको कदमको समिक्षा गर्ने जनाएका छन् ।
यसैबीच नेकपा भित्र स्थायी समितिको बैठकको माग गरिएको छ । जनार्दन शर्मा, सुरेन्द्र पाण्डे, अष्टलक्ष्मी शाक्य र भीम रावल लगायतको पहलमा आधाभन्दा बढी स्थायी समिति सदस्यले बैठकको माग गरेका छन् ।
वि.सं.२०७७ वैशाख १० बुधवार २१:५९ मा प्रकाशित
