Sansar News
१५ बैशाख, काठमाण्डौं । अमेरिकामा एकैसातामा दुई नेपालीको मृत्यु भएको छ । जसमा एक जनाको कोरोना भाइरस कोभिड १९ को संक्रमणका कारण र एकजना घरभित्रै मृत भेटिएका थिए ।
अमेरिकाको कोलोराडोको बोल्डरमा बस्ने लोकेन्द्र कार्कीको २४ अप्रिल (शनिबार) कोरोना संक्रमणका कारण मृत्यु भएको हो । सपरिवार बोल्डरमा बस्दै आएका उनका दुई छोरी र एक छोरा रहेका छन् भने अमेरिकाबाट नेपाल आएकी श्रीमती लकडाउनका कारण नेपालमै रोकिएकी छन् ।
उनको मृत्युले मर्माहत भएको भन्दै अमेरिकामै रहेका गीतकार ज्ञानेन्द्र गदालले शोकसन्तप्त परिवारमा समवेदना व्यक्त गरेका छन् ।
विराटनगर महानगरपालिका ३ घर भएका कार्की लामो समयदेखि बोल्डरमा रहदै आएका आएका थिए ।
त्यसैगरी अमेरिकाकै टेक्सासमा रहेका पोखराका दीपेश थापा विहिबार आफ्नै घरभित्र मृत भेटिएका छन् ।
उनका दाजु दिवस थापाका अनुसार पटक पटक फोन गर्दा पनि नउठेपछि कोठामा गएर हेर्दा उनी अचेत भेटिएका थिए । दिवसले तत्काल एम्बुलेन्स बोलाएका थिए । तर, एम्बुलेन्सका स्वास्थ्यकर्मीले दिपेशको मृत्यु भइसकेको जानकारी दिएका थिए । उनको मृत्यु हृदयघातबाट भएको प्रारम्भिक अनुसन्धानमा बताइएको छ । १७ वर्षदेखि अमेरिकामा रहँदै आएका थापा श्रीमती र दाजुसहित अमेरिकामा रहेका थिए ।
वि.सं.२०७७ वैशाख १५ सोमवार ०९:२० मा प्रकाशित
