Sansar News
२४ वैशाख, काठमाडौँ । नेपाल कम्युनिष्ट पार्टी(नेकपा)को सचिवालय बैठक चल्दाचल्दै स्थगित भएको छ ।
प्रधानमन्त्री निवास बालुवाटारमा बसिरहेको बैठकबाट प्रधानमन्त्री तथा पार्टी अध्यक्ष केपी शर्मा ओली उठेर हिडेपछि बैठक रोकिएको थियो ।
नेकपा स्रोतका अनुसार प्रधानमन्त्री ओली आराम गर्न भनि कोठा भित्र लागेको केही समयपछि उनी पुनः आएको बताइएको छ । तर बैठकमा सुरु भएका छलफलका विषयमा ओली रिसाएरै बैठक स्थल छोडेको एक अर्को सुत्रले बताएको छ ।
भोलि वैशाख २५ गते बस्ने भनिएको स्थायी समितिको बैठकको तयारीका लागि आजको सचिवालय एजेण्डा तयार गर्न बसेको थियो । दुई अध्यक्ष बीच सहमति गरी महासचिवमार्फत एजेण्डा पेश हुने भनिए पनि सो काम सम्पन्न नभएको पनि बताइएको छ ।
नेकपा भित्र दुई अध्यक्षको प्रष्ट कार्यविभाजन, अन्य नेताहरुको व्यवस्थापन तथा एक व्यक्ति एक पद जस्ता विषयलाई एजेण्डा बनाएर पार्टी एकतालाई अझ सुदृढ गर्ने भनिँदै आएको थियो । तर अचानक स्थगित भएको सचिवालय बैठकपछाडी भोलिको स्थायी समितिको बैठक अनिश्चित बनेको छ ।
प्रवक्ता नारायणकाजी श्रेष्ठले वैशाख २० गतेको सहमति अनुसार एजेण्डा तयार गर्ने गृहकार्य नपुगेको कारण दुई अध्यक्ष फेरि छलफलमा बस्ने बताएका छन् ।
वि.सं.२०७७ वैशाख २४ बुधवार १८:३३ मा प्रकाशित
