हामी सबैकाे संसारन्यूज

२४ बैशाख, काठमाण्डौं । नेपालमा मंगलबार (बैशाख २४ सम्म) ६७ हजार ६६ जनामा कोरोना परीक्षण गरिएको छ । जसमा पछिल्लो २४ घण्टामा ९९१ जनामा परीक्षण गरिएको स्वास्थ्य तथा जनसंख्या मन्त्रालयले जानकारी दिएको छ ।

मन्त्रालयका अनुसार आजसम्म पिसीआर प्रविधिबाट १४ हजार ९६ र आरडिटी प्रविधिबाट ५२ हजार ९७० जनामा परीक्षण गरिएको हो । पछिल्लो २४ घण्टामा देशैभरी जम्मा २४६ मात्र वटा पिसीआर नमुना परीक्षण गरिएको हो । मंगलबारको तुलनामा पिसीआर र र्यापिड टेष्ट झण्डै ५९१ले कमी हो । मंगलबार एकैदिन १५८२ परीक्षण गरिएकोमा बुधवार ९९१ जनामा मात्र परीक्षण गरिएको हो ।

प्रदेश परीक्षण विवरण
त्यसैगरी प्रदेश नं १ मा ६ हजार ३२८, प्रदेश नं २ मा ५ हजार ७९७, बाग्मती प्रदेशमा ८ हजार ९४० , गण्डकी प्रदेशमा ६ हजार १९७, प्रदेश नं ५ मा ५ हजार ३३०, कर्णाली प्रदेशमा ५ हजार ५ हजार ९७७ र सुदूरपश्चिम प्रदेशमा १४ हजार ४०१ जनामा आरडिटी प्रविधिबाट परीक्षण गरिएको हो ।

क्वारेन्टाइनमा रहनेको संख्या
हाल सातै प्रदेशमा विभिन्न क्वारेन्टाइनमा १९ हजार ७३४ जना रहेका छन् । जसमा प्रदेश नं १ मा २ हजार १८, प्रदेश नं २ मा १ हजार २५६, बाग्मती प्रदेशमा २६२, गण्डकी प्रदेशमा ६५७, प्रदेश नं ५ मा ७ हजार ८८४, कर्णाली प्रदेशमा ३ हजार ७५८ र सुदूरपश्चिम प्रदेशमा ३ हजार ८९९ जना रहेको स्वास्थ्य मन्त्रालयले बुधबारको नियमित पत्रकार सम्मेलनमा जानकारी दिएको हो ।

आइसोलेसन र रेडजोनमा
त्यसैगरी हालसम्म आइसोलेसनमा १३६ जना रहेका छन् । जसमा उपत्यकामा ७ जना र बाहिरका अस्पतालमा १२९ जना रहेका छन् । साथै आजसम्म रेडजोन (संभावित संक्रमति) मा रहेकाको संख्या ३३३ पुगेको छ । पछिल्लो २४ घण्टामा ३ जना थपिएका हुन् । उनीहरुको कन्ट्याक ट्रेसिङ कार्य भइरहेको बताइएको छ ।

संक्रमितको संख्या ९९ पुग्यो
त्यसैगरी नेपालमा हालसम्म ९९ जनामा संक्रमण देखिएको छ । आज एकैदिन विरगन्जको पर्सामा १७ जनामा संक्रमण देखिएपछि क्रमितको संख्या ९९ पुगेको हो । हालसम्म संक्रमित हुनेमा पुरुष ७१ र महिला २८ जना रहेका छन् । आज संक्रमित भेटिएका १७ जनामध्ये १० पुरुष र ७ महिला छन् । उनीहरु वीरगन्ज महानगरपालिका ३ छपकैयाका स्थानीय वासिन्दा हुन् । संक्रमित हुनेमा २ महिनाको बालकसहित ६६ वर्षसम्मका रहेका छन् भने उनीहरु एकै परिवारका सदस्य रहेको बताइएको छ ।

कुन प्रदेशमा कति संक्रमित
हालसम्म संक्रमित भएकामध्ये प्रदेश १ मा ३१, प्रदेश २ मा ३०, बाग्मती प्रदेशमा ७, गण्डकी प्रदेशमा २ प्रदेश ५ मा २४ र सुदूरपश्चिम प्रदेशमा ५ जना संक्रमित भएको तथ्यांक रहेको छ । सातैवटा प्रदेशमध्ये कर्णाली प्रदेशमा अहिलेसम्म संक्रमित भेटिएका छैनन् ।
संक्रमित ९९ मध्ये ७१ जनाको विभिन्न अस्पतालमा उपचार भइरहेका छन् । जसमा रुपन्देही १, नेपालगन्ज २३, धनगढी १, भरतपुर १, विरगन्ज २६ र विराटनगर अस्पतालमा ३१ जना गरेर जम्मा ७१ जनाको उपचार भइरहेको छ । उनीहरुको अवस्था सामान्य रहेको पनि मन्त्रालयले जानकारी दिएको छ ।

डिस्चार्ज हुनेको संख्या २२ पुग्यो
त्यसैगरी आज डिस्चार्ज भएका ६ जनासहित हालसम्म २२ जना निको भएर घर फर्किइसकेका छन् । आज डिस्चार्ज हुनेमा उदयपुरको भुल्के मस्जिदमा बैशाख ५ र ६ गते भेटिएका १२ संक्रमित मध्ये ६ जना भारतीय नागरिक रहेका छन् । उनीहरुको तीनपटक गरिएको पिसीआर परीक्षणमा नेगेटिभ देखिएपछि उनीहरुलाई डिस्चार्ज गरिएको कोशी अस्पताल विरगन्जले जनाएको छ ।

निको भएर घर गएका तीन जनामा पुनः संक्रमण देखियो
२४ बैशाख, काठमाण्डौं । कोरोना संक्रमणबाट निको भएर घर फर्र्किएका तीनजनामा पुनः कोरोना पोजेटिभ देखिएको छ ।
पुनः पोजेटिभ देखिएकामा बैशाख १४ गते डिस्चार्ज भएका रौतहटका १९ वर्षीय र पर्साका ४४ वर्षीय दुई पुरुषमा पुनः पोजेटिभ देखिएको हो । उनीहरुको विरगन्जस्थित नारायणी अस्पतालमा उपचार भइरहेको छ ।

त्यसैगरी बैशाख ११ गते डिस्चार्ज भएका काठमाण्डौंका ५८ वर्षीय पुरुषमा पुनः पोजेटिभ देखिएको छ । फलोअपमा अस्पताल आएका उनको पुनः संक्रमण देखिएपछि पाटन अस्पतालमा उपचार भइरहेको पनि स्वास्थ्य मन्त्रालयले जानकारी दिएको छ ।

देशैभरी कोरोना परीक्षण कीटको अभाव
हाल देशैभरी कोरोना कीटको आभाव रहेको छ । कतिपय क्वारेन्टाइनमा रहेका र संभावित संक्रमितहरुको नमुना परीक्षणका कार्य रोकिएका छन् । स्वास्थ्य मन्त्रालयले कीटको अभावमा परीक्षण कम भएको र विहिबारसम्म सामग्री ल्याइने जानकारी समेत दिएको छ । कीटको अभावमा मंगलबार पिसीआर र र्यापिड प्रबिधिबाट १५८२ जनामा परीक्षण गरिएकोमा आज ९९१ जनामा मात्र गरिएको छ ।

नेपालगन्जमा कन्ट्रयाक ट्रेसिङ र परीक्षण बढाईयो
नेपालगन्जमा आइतबार १५ र मंगलबार ७ जनामा कोरोना संक्रमण भेटिएपछि भोली (बैशाख २५ गते) सम्मका लागि नेपालगन्जमा निशेधाज्ञा जारी गरिएको छ । कोरोना संक्रमतिहरुको सम्पर्कमा रहेकाहरुको कन्ट्रयाक टे«सिङमा सहज होस् भनेर निशेधाज्ञा जारी गरिएको थियो । साथै नेपालगन्जमा कम्तिमा पनि ३०० जनामा कोरोनाको पिसीआर परीक्षण गरिने बताइएको छ । उक्त कार्य आज बिहानै देखि सुरु भएको छ ।

यसअघि शुक्रबार नेपालगन्जको डिएसपी रोडस्थित मोसीटोलका ६० वर्षीय वृद्धमा कोरोना संक्रमण भेटिएसँग्ै उनको सम्पर्कमा रहेकाहरुको कन्ट्रयाक ट्रेसिङमा थप संक्रमित भेटिएका छन् । संक्रमितहरुको नेपागन्जको खजुरास्थित सुशील कोइराला प्रखर क्यान्सर अस्पतालमा उपचार भइरहेको र उनीहरुको स्वास्थ्य सामान्य रहेको बताइएको छ ।

एकसाताका लागि लकडाउन थप
त्यसैगरी आज बसेको मन्त्रिपरिषद् बैठकले थप एकसाताका लागि लकडाउन थप गरेको छ ।
प्रधानमन्त्री निवास वालुवाटारमा बुधबार बसेको मन्त्रिपरिषद्को बैठकले थप ७ दिन लकडाउनको समय थप गरेको हो । उक्त बैठकमा प्रधानमन्त्री केपी शर्मा ओली समेत सहभागी रहेका थिए ।

यसअघि लकडाउनलाई केही खुकुलो बनाउने भनिएपनि पछिल्लो पटक नेपाल गन्ज र पर्सामा संक्रमितको संख्या ह्वात्तै बढेकाले लकडाउन यथावत राख्ने निर्णय गरिएको हो । साथै लकडाउनलाई कडा रुपमा पालना गर्न पनि अनुरोध गरिएको छ ।

नेपालमा ६६ हजार बढीमा कोरोना परीक्षण, आइसोलसनमा १२० र रेडजोनमा ३३० जना