Sansar News
२६ वैशाख, काठमाडौँ । नेपालमा पनि कोरोना भाइरसको संक्रमण हुनेको संख्या बढीरहेको छ तर हाम्रो लागि खुशीको कुरा हो, अहिलेसम्म नेपालमा कोरोना संक्रमित देखिएका कसैले पनि ज्यान गुमाउनु परेको छैन ।
हालसम्म १०२ जनामा कोरोना भाइरसको संक्रमण देखिएको छ भने ३० जना बिरामी सन्चो भएर अस्पतालबाट डिस्चार्ज भएका छन् । यो पनि खुशीको कुरा हो की कोही पनि संक्रमितलाई भेन्टिलेटरमै राखेर उपचार गर्नुपर्ने अवस्था पनि आएको छैन ।
आज मात्र ८ जना कोरोना संक्रमित अस्पतालबाट डिस्चार्ज भएका छन् । विराटनगरस्थित कोसी अस्पतालको कोभिड–१९ उपचार केन्द्रको आइसोलेसनमा उपचाररत ८ जना कोरोना संक्रमित निको भएर डिस्चार्ज भएका हुन् । यसरी डिस्चार्ज हुनेहरुमा भारतका एक पुरुष, विराटनगरका २ जना पुरुष र उदयपुरकी एक महिला र चार पुरुष रहेका छन् ।
उनीहरुको सोमबारदेखि लगातार गरिएको स्वाब परीक्षण रिपोर्टमा बिहीबार कोरोना भाइरस नेगेटिभ देखिएको थियो । भुल्केका १५ जनाको स्वाब परीक्षण गरिएकामध्ये ८ जनाको रिपोर्ट नेगेटिभ आएको र ७ जनाको रिपोर्ट पोजिटिभ नै आएको अस्पतालले जानकारी दिएको छ ।
डिस्चार्ज भएकाहरुलाई प्रदेश १ का सामाजिक विकास मन्त्री जीवन घिमिरेले बिदाई गरेका थिए ।
डिस्चार्ज भएका उनीहरु आजै सिधै परिवारको सम्पर्कमा भने जान पाउँदैनन् । डिस्चार्ज भएका मध्ये एकजनालाई भुल्के र अन्य ७ जनालाई विराटनगर १५ रानीस्थित ‘रानी मरकज’ को क्वारेन्टिनमा पठाइएको कोसी अस्पतालकी मेडिकल सुपरिटेन्डेन्ट डा. संगिता मिश्रले बताइन् ।
वि.सं.२०७७ वैशाख २६ शुक्रवार १७:२४ मा प्रकाशित
