हामी सबैकाे संसारन्यूज

७ जेठ, काठमाण्डौं । बहराइनमा कार्यरत एक नेपालीको कोरोना संक्रमणबाट मृत्यु भएको भन्ने अपुष्ट र भ्रामक समाचारप्रति नेपाली दूतावास बहराइनले आपत्ति जनाएको छ ।

मे महिनाको पहिलो साता पानीमा डुबेर एक युवाको मृत्यु भएको स्पष्ट कागजात बहराइनको आधिकारीक निकायबाट प्राप्त कागजात दूतावाससँग सुरक्षित रहेको अवस्थामा बहराइनको निकायलाई नै चुनौती दिनेगरी गलत सूचना प्रशारण गरिएको भन्दै दूतावासले आपत्ति जनाएको हो ।

‘बहराइनी निकायबाट जारी सूचनालाई नै चुनौती दिने गरी नेपाली कामदारको हकहित प्रवद्र्धन हेतु सन्चालित कुनैपनि संस्थाबाट गलत सूचना भविष्यमा प्रवाह नहोस् भन्ने तर्फ दूतावास सबैमा हार्दिक अपिल गर्दछ,’ दूतावासद्धारा मंगलबार जारी विज्ञप्तिमा भनिएको छ, ‘बहराइनको स्वास्थ्य मन्त्रालयको पछिल्लो जानकारी अनुसार यहाँ कार्यरत कुनैपनि नेपालीको कोरोना भाइरसका कारण निधन नभएको पनि दूतावास प्रष्ट पार्दछ ।’

दूतावासले विगत तथा हालमा समेत राजदूतावास तथा बहराइनमस्थित विभिन्न संघ÷संस्थाबीच विविध क्रियाकलापहरुमा सहयोग तथा सहकार्य आदान प्रदान हुँदै आएको र भविष्यमा पनि सोहि निरन्तरताका लागि दूतावास परिवार सकारात्मक रहेको समेत दूतावासले जनाएको छ ।