हामी सबैकाे संसारन्यूज

७ जेठ, काठमाण्डौं । नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ ले नेपाल कम्युनिष्ट बेपत्ता योद्धाका परिवार र तिनका सन्ततिको भविष्य निर्माणका लागि उचित नीति, योजना र कार्यक्रम प्रस्तुत गर्न भन्दै पार्टी तथा सरकारको ध्यानाकर्षण गराएका छन् ।

जनयुद्धका क्रममा बेपत्ता भएका सम्पूर्ण योद्धाहरुको स्मृति दिवसका सन्दर्भमा उनीहरुप्रति उच्च सम्मान व्यक्त गर्दै अध्यक्ष प्रचण्डले सशस्त्र र शान्तिपूर्ण आन्दोलनका क्रममा बेपत्ता भएका योद्धाहरुको संघर्षका कारण नै आज मुलूक संघीय लोकतान्त्रिक गणतन्त्रको अभ्याससहित समाजवादी क्रान्तिको तयारीको चरणमा रहेको समेत अध्यक्ष प्रचण्डले बताएका छन् ।

‘महान् बेपत्ता योद्धाहरुको त्यागको सम्मान गर्दै समाज परिवर्तनमा उहाँहरुले देखेको सपनालाई सार्थकतामा बदल्नु हामी कम्युनिष्ट क्रान्तिकारीहरुको जिम्मेवारी हो, स्मृति दिवसका अवसरमा अध्यक्ष प्रचण्डले भनेका छन, ‘ यस सन्दर्भमा हाम्रो पार्टी बेपत्ता योद्धाहरुको त्याग र समर्पणको उच्च सम्मानसहित क्रान्तिका बाँकी कार्यभार पूरा गर्ने प्रतिवद्धता दोहोर्याउँछ ।’