हामी सबैकाे संसारन्यूज

१६ जेठ, काठमाण्डौं । नेपालमा क्वारेन्टाइनमा रहनेको संख्या झण्डै १ लाख पुगेको छ । स्वास्थ्य तथा जनसंख्या मन्त्रालयका अनुसार नेपालमा आजसम्म ९९ हजार ३३६ जना क्वारेन्टाइनमा रहेका छन् । यो संख्या दिनहुँ बढिरहेको छ । यी मध्ये सबैजसो भारतबाट फर्किएका हुन् ।

मन्त्रालयका अनुसार प्रदेश नं १ मा २,७४७ प्रदेश नं २ मा १६,६७८ बाग्मती प्रदेशमा १,९५४ गण्डकी प्रदेशमा २,८१४, प्रदेश नं ५ मा ३२,३७३, कर्णाली प्रदेशमा ३२,३७३ र सुदूरपश्चिम प्रदेशमा २५,७६५ जना रहेको स्वास्थ्य मन्त्रालयले बुधबार (जेठ १६ गते) को नियमित पत्रकार सम्मेलनमा जानकारी दिएको हो ।

स्वास्थ्य मन्त्रालयका अनुसार पछिल्लो समय क्वारेन्टाइनमा रहनेको संख्या बढ्दै गएकाले क्वारेन्टाइनमा रहनेहरुलाई थप व्यवस्थित बनाइनेछ । उनीहरुका लागि हेल्थ किट उपलब्ध गराइने पनि मन्त्रालयले जानकारी दिएको छ । जसमा मास्क, सेनिटाइजरलगायतका सामग्री रहेको किट स्वास्थ्य सेवा विभागद्धारा उपलब्ध गराइने पनि मन्त्रालयले जानकारी दिएको छ । मन्त्रालयले भारतबाट जति पनि भित्रिएका छन् उनीहरुको स्वास्थ्य परीक्षण र सहजताका लागि कार्य गरिरहेको पनि जानकारी दिएको छ ।

मन्त्रालयले थप क्वारेन्टाइनको व्यवस्थापनका लागि स्थानीय सरकार, प्रदेश सरकार र संघीय सरकार सबैले हातोमालो गरेर व्यवस्थापन गर्न जरुरी रहेको समेत बताइएको छ ।

खानपिन, सेक्युरेटी सरफाई लगायतमा सबैले ध्यान दिनुपर्ने र सबै क्षेत्रले सहकार्य गरेर अगाडि बढ्नुपर्ने समेत मन्त्रालयका प्रवक्ता डा. विकास देवकोटाले अनुरोध गरेका छन् । उनले संक्रमितको संख्या बढ्दै जाँदा होम क्वारेन्टाइनमै रहनुपर्ने अवस्था रहेकाले त्यसको तयारीमा लाग्न पनि अनुरोध गरिएको छ । साथै कोरोना संक्रमितको उपचार र जाँचमा खटिने स्वास्थ्यकर्मीलाई सहयोग गरिदिन समेत अनुरोध गरेका छन् ।