हामी सबैकाे संसारन्यूज

१८ जेठ, काठमाण्डौं । प्रवासी नेपाली एकतामन्च फ्रान्सले भारतले नेपाली भूमी अतिक्रमण गरेर भारतले आफ्नो रवैया र विस्तारवादी नांगो चरित्र देखाएको भन्दै भत्र्सना गरेको छ ।

मन्चले मे २९ गते नेपाली दूतावास पेरिसमार्फत् नेपाल सरकारलाई दवाव, खबरदारी तथा समर्थन गर्दै सीमाको विषयमा सहमति र सम्मानको आधारमा सधैका लागि सीमा समस्या समाधान गर्नुपर्ने भन्दै ज्ञापनपत्र पठाएको मन्चका सचिव मनोज पौडेल ‘सुमन’ संसारन्युजलाई जानकारी दिएका छन् ।

‘नेपाली भूभाग लिपुलेक हुँदै तिब्बतको मानसरोवर जोड्ने ८० किलोमिटर सडक भारतले केहि समय अगाडी उद्घाटन गरेको कुरा हामी सबैलाई अवगत नै छ,’ मंचले भनेको छ, ‘सार्वभौम मुलुक नेपालको भूभाग (लिम्पियाधुरा, लिपुलेक र कालापानी) लाई भारतीय सिमाना भित्र राखेर भारत सरकारद्वारा जारी गरिएको नक्सा र निर्माण गरिएको सडकले नेपाली राष्ट्रिय स्वाधिनता, भौगोलिक अखण्डता र सार्वभौमिकता माथि विस्तारवादको नाङ्गो चरित्र प्रदर्शन भएको तथा सुगौली सन्धी देखिका ऐतिहासिक तथ्य, दस्ताबेज र प्रमाणले नेपाली भूमि हो भन्ने प्रमाणित हुदाहुदै पनि पटक-पटक नेपालको अस्मिता प्रति अतिक्रमण गर्ने यस्ता भारतीय रवैयाको प्रवासी नेपाली एकता मञ्च फ्रान्स घोर भत्सर्ना गरेको गर्दछौ ।’