Sansar News
२८ जेठ, काठमाडौँ । मकवानपुरमा ज्वाइँले सासुको हत्या गरेका छन् । मकवानपुरगढी गाउँपालिका वडा नं १ फूलबारीटोलकी ७२ वर्षीया कान्छीमाया भोम्जनलाई उनकै कान्छा ज्वाइँ पदमबहादुर नेपालीले हत्या गरेको प्रहरीले जनाएको छ ।
अपाङ्गता भएकी छोरीसँग बस्दै आएकी वृद्धाको घरमा गत वैशाख ११ गतेदेखि प्यूठान घर भएका ज्वाइँ प्रहरीका पूर्व हबल्दार पदमबहादुर नेपालीसमेत बस्दै आएका थिए । उनै नेपालीले धारिलो हतियार प्रहार गरेर सासुको हत्या गरेको र उनलाई स्थानीयवासीले नियन्त्रणमा लिएर प्रहरीलाई बुझाएको स्थानीय कमला भोम्जनले जानकारी दिएका छन । बिहान ४ बजेको समयमा धारिलो हतियारले आक्रमण गरी हत्या गरेको र होहल्ला भएपछि स्थानीयवासीले थाहा पाइ हत्यारालाई नियन्त्रणमा लिएको मकवानपुरगढी गाउँपालिका वडा नं १ का अध्यक्ष आइतसिंह लामाले जानकारी दिए ।
हाल घटनास्थलमा जिल्ला प्रहरी कार्यालय मकवानपुरका प्रहरी नायब उपरीक्षक इन्द्रबहादुर रानासहितको प्रहरी टोली पुगेको र प्रहरीले हत्यामा संलग्न नेपालीलाई नियन्त्रणमा लिइ अनुसन्धान अगाडि बढाएको नायब उपरीक्षक रानाले जानकारी दिएका छन । रानाका अनुसार पक्राउ परेका नेपालीले आफूले सासुको हत्या गरेको स्वीकार गरेका छन् ।
वि.सं.२०७७ जेठ २९ बिहीवार ०८:४० मा प्रकाशित
