हामी सबैकाे संसारन्यूज

२ असार, काठमाण्डौं । कोरोना संक्रमणबाट बाँकेकी १ महिलाको मृत्यु भएको छ ।  बाँकेको नेपालगन्ज मेडिकलमा जेठ ३० गते भर्ना भएर निमोनियाको उपचार गराइरहेकी ४६ वर्षीया महिलाको सोमबार साँझ मृत्यु भएको हो ।

आइसीयुमा राखेर उपचार गरिएकी बैजनाथ गाउँपालिका वडा नं ६ एचगाउँकी ४६ वर्षीया महिलाको सोमबार बेलुका मृत्यु भएको र मंगलबार कोरोना परीक्षणको नतिजा पोजेटिभ आएको जिल्ला प्रशासन कार्यालय बाँकेले जनाएको छ ।
बाँकेका प्रमुख जिल्ला अधिकारी राम बहादुर कुरुम्बाङका अनुसार उनी ३० जेठमा अस्पतालमा भर्ना भएर आइसीयुमा उपचार गराइरहेकी थिइन्, सोमबार मृत्यु भएको र मंगलबार कोरोना संक्रमण पुष्टि भएको हो ।

उनी भारत तथा अन्य ठाउँबाट नआएको र सामुदायिक व्यक्ति नै भएकोले कसरी कोरोना संक्रमण भयो भन्ने कुरा कन्टयाक ट्रेसिङ गरिरहेको बैजनाथ गाउँपालिकाका अध्यक्ष मान बहादुर रुचाल ठकरीले संसारन्युजलाई जानकारी दिएका छन् ।

बाँकेमा उनीसँगै २ जनाको मृत्यु भएको छ । यसअघि पनि भारतबाट फर्किएर नरैनापुरको क्वारेन्टिनमा बसेका २५ वर्षीय युवाको क्वारेन्टिनमै मृत्यु भएको थियो ।

सोमबार मृत्यु भएकी महिलासँगै नेपालमा कोरोना संक्रमणबाट मृत्यु हुनेको संख्या २० पुगेको छ । जसमा १ बालिका, २ महिला र १७ जना पुरुष रहेका छन् ।

सोमबार कोरोना संक्रमणका कारण मृत्यु भएकी महिलाको स्वास्थ्य मन्त्रालयले आधिकारी जानकारी भने गराएको छैन ।