हामी सबैकाे संसारन्यूज

५ असार, काठमाडौं । सरकारले बन्दाबन्दी(लकडाउन) क्रमशः खुकुलो बनाउँदै गर्दा कोरोना संक्रमणको जोखिम कायमै रहेको भन्दै थप सर्तकता अपनाउन आग्रह गरेको छ ।

गृहमन्त्रालयले शुक्रबार जारी गरेको ‘बन्दाबन्दीलाई व्यवस्थित गर्ने सम्बन्धी सुरक्षा मापदण्ड–२०७७’ मार्फत स्वास्थ्य सम्बन्धी उच्च सतर्कता अपनाएर आफ्नो नियमित काम कारबाही सञ्चालन गर्न सर्बसाधारणलाई आग्रह गरेको छ ।

कोभिड १९ संक्रमणको जोखिम कायम नै रहेको मन्त्रालयले जनाएको छ ।

अत्यावश्यक काम बाहेक आफू रहेको आवास/कार्यस्थलबाट अन्यत्र आवतजावत नगर्ने नगराउने, न्यूनतम दुई मिटरको सामाजिक दुरी कायम गर्ने, बाहिर निस्कँदा अनिवार्य रुपमा मास्क प्रयोग गर्नुपर्ने र स्यानिटाइजर साथमा राख्न आग्रह गरिएको छ ।

त्यस्तै, अत्यावश्यक कामबाहेक राति दश बजेदेखि बिहान पाँच बजेसम्म सर्वसाधारणलाई हिँडडुलमा प्रतिबन्ध लगाइएको छ । साथै, आवतजावत गर्दा वा कार्यस्थलमा कार्यरत रहँदा न्यूनतम दुई मिटरको सामाजिक दूरी कायम गर्नुपर्ने जनाएको छ ।

यसका साथै, विवाह, ब्रतबन्ध, मृत्यु संस्कार, चाडपर्व, पूजापाठलगायतका सामाजिक तथा सांस्कृतिक कार्यक्रमहरु गर्नैपर्ने अवस्थामा तोकिएको सामाजिक दूरी सुनिश्चित कायम गर्न र यस प्रकारको जमघटहरुमा १५ जना भन्दा बढी भेला हुन नपाइने बताइएको छ ।

ज्येष्ठ नागरिक, बालबालिका, सुत्केरी, गर्भवती महिला र अशक्त व्यक्तिलाई अत्यावश्यक कामबाहेक घर बाहिर ननिस्किन प्रोत्साहित गर्न पनि गृहले भनेको छ ।

गृहका अनुसार मालसामान ढुवानी गर्ने कुनै पनि प्रकारको सवारी साधनहरुले चालक, सहचालक बाहेक अन्य कुनै पनि यात्रुहरुको ओसारपसार गर्न पाइने छैन ।