हामी सबैकाे संसारन्यूज

१५ असार, काठमाडौँ । भूमि व्यवस्थापन तथा सहकारीमन्त्री पद्मा अर्यालले पर्वतको दक्षिणी भेग पैञ्यूँ क्षेत्रमा मालपोत र नापी सेवाको छिट्टै प्रबन्ध हुने बताएकी छन् ।

नेपाल कम्युनिष्ट पार्टीका नेता मित्रलाल बस्यालसहितको टोलीसँगको भेटमा उनले सो बताएकी हुन् ।

पवर्तको पैञ्यूँ क्षेत्रका जनता नापी र मालपोत सेवा लिन कुश्मा सम्मको यात्रा गरिरहनु पर्दा संघीयताको प्रतिफल अनुभूत गर्न नपाएको भन्ने जनताको जिज्ञासालाई सम्बोधन गर्दै मन्त्री अर्यालले उच्च प्राथमिकताका साथ छिट्टै काम हुने बताएकी हुन् ।

पर्वतको सुदुर दक्षिण क्षेत्रमा पर्ने विहादी र पैञ्यूँ गाउँपालिका तथा महाशिलाका अधिकांश वडा सो सेवाबाट लाभान्वित हुने नेता मित्रलाल बस्यालले जनाएका छन् । सो समस्या बारे पैञ्यूँ ४ का वडाअध्यक्ष महेन्द्र श्रेष्ठले संजाल र फोनमार्फत यसअघि लविङ अघि बढाएका थिए । सो मागका लागि पैञ्यूँ गाउँपालिका तथा नेपाल कम्युनिष्ट पार्टी(नेकपा), नेपाली काँग्रेससहित पैञ्यूँमा क्रियाशिल अन्य दल र नागरिक समाजले डेलिगेसनको तयारी गरिरहेको समेत बुझिएको छ ।

मन्त्रीलाई समस्या सुनाउन गएको मित्रलाल बस्यालसहित भरत शर्मा, निलकण्ठ तिवारी, सुन्दर भुसाल र छवि काफ्लेको टोलीले यसअघि राष्ट्रियसभाका अध्यक्ष गणेश तिमिल्सिनालाई भेटी आवश्यक पहलका लागि अनुरोध समेत गरेको थियो ।