Sansar News
काठमाडौं । सत्तारुढ दल नेपाल कम्युनिष्ट पार्टी (नेकपा)भित्र देखिएको विवाद समाधानका लागि अध्यक्षद्वय केपी शर्मा ओली र पुष्पकमल दाहाल ‘प्रचण्ड’बीच भएको ‘वान टु वान’ छलफल सकिएको छ । प्रधानमन्त्री निवास बालुवाटारमा सोमबार भएको छलफलमा समझदारीको विन्दु खोज्ने गरि विषयकेन्द्रित छलफल भएको नेकपा स्रोतले जनाएको छ ।
दोस्रो तहका नेता नराखी भएको ‘वान टु वान’ छलफल विषयगत रुपमा अगाडि बढेको नेकपा स्रोतले बताएको छ । जनाइएअनुसार दुई अध्यक्षबीच मंगलबार पुनः वान टु वान वार्ता हुनेछ । स्रोतले जनाएअनुसार छलफलमा आवश्यक परे सचिवालयका नेताहरु पनि सहभागी हुन सक्नेछन् ।
यसअघि आइतबार दुईअध्यक्षसहित महासचिव विष्णु पौडेल, प्रदेश ५ का मुख्यमन्त्री शंकर पोखरेल र स्थायी समिति सदस्यद्वय वर्षमान पुन र जनार्दन शर्मा छलफलमा सहभागी थिए । आइतबारको छलफलले सहभागी ४ नेताहरुले सहमतीय बिन्दु पहिल्याउने गरि ड्राफ्ट तयार गर्ने निर्णय भएको थियो ।
सोमबार विषयगत रुपमा अध्यक्षद्वयबीच वान टु वान वार्ता भएसँगै विवाद सहमती नजिक पुग्न थालेको आंकलन गरिएको छ । स्रोतले जनाएअनुसार मंगलबार हुने छलफलले थप केहि निष्कर्ष दिनेछ ।
सोमबार विषयगत रुपमा अध्यक्षद्वयबीच वान टु वान वार्ता भएसँगै विवाद सहमती नजिक पुग्न थालेको आंकलन गरिएको छ । स्रोतले जनाएअनुसार मंगलबार हुने छलफलले थप केहि निष्कर्ष दिनेछ ।
स्थायी समिति बैठकका बीच दुई तिहाई सदस्यले प्रधानमन्त्री ओलीको राजीनामा माग्ने तयारी गरेसँगै नेकपाभित्र विवाद चुलिएको हो । पार्टी अध्यक्ष प्रचण्डसहितका सचिवालयका दुई तिहाई सदस्य पनि ओलीले राजीनामा दिनुपर्ने मागमा छन् ।
यता प्रधानमन्त्री ओली कुनै हालतमा राजीनामा नदिने बरु आवश्यक कदम चाल्ने तयारीमा छन् । विवाद बढ्दै जाँदा संसद अधिवेशन स्थगन गराएका उनले अध्यादेश ल्याएरै भएपनि पार्टीभित्रका विरोधीलाई तह लगाउने तयारी गरेका छन् ।
वि.सं.२०७७ असार २२ सोमवार १५:१५ मा प्रकाशित
