Sansar News
काठमाडौं । सत्तारुढ नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल समूहको भेलाले तत्काल केद्रीय समितिको बैठक बोलाउनु पर्ने निष्कर्ष निकालेको छ । दाहाल–नेपाल समुहका सचिवालय एंव स्थायी समितिका सदस्यहरुको बिहिबार साँझ खुमलटारमा भएको भेलाले यस्तो निष्कर्ष निकालेको हो ।
पार्टी विवादका बारे प्रधानमन्त्री एंव पार्टी अध्यक्ष केपी शर्मा ओलीसँग भएको छलफलमा सहमति नजुटेपछि दाहाल–नेपाल समुहका नेताहरु साँझ छलफलमा जुटेका थिए । बालुवाटारबाट प्रचण्ड र नेपाल फर्किए लगत्तै सचिवालय सदस्यहरु झलनाथ खनाल, बामदेव गौतम, नारायणकाजी श्रेष्ठ र रामबहादुर थापा बादललगायतका नेताहरु खुमलटार पुगेका थिए ।
खुमलटार भएको छलफलमा सहभागी एक स्थायी समिति सदस्यका अनुसार शुक्रबार बस्ने स्थायी समितिले केन्द्रीय समिति बैठक बोलाउन र मिति तोक्न दवाव दिनेछ ।
यसअघि बिहिबार दिउसो बालुवाटार बैठकमा प्रचण्ड र माधव नेपालले ओलीलाई प्रधानमन्त्रीबाट राजीनामा दिन आग्रह गरेका थिए तर ओलीले ठाडै अस्वीकार गरेका थिए ।
सत्तारुढ नेकपाभित्र विवाद चर्किएसँगै स्थायी कमिटी बैठक साउन २ सम्मको लागि स्थगित छ । विवाद बढ्दा शीर्ष नेताहरु बैठक नै रोकेर छलफलमा जुटेका थिए ।
गत असार १० गतेदेखि जारी स्थायी कमिटी बैठकमा प्रधानमन्त्री ओलीको राजीनामा मागिएसँगै विवाद उत्कर्षमा पुगेको थियो । नेकपाभित्रका प्रचण्ड–माधव समुहका ३० स्थायी समिति सदस्यले प्रधानमन्त्री ओलीको पार्टी अध्यक्ष र प्रधानमन्त्री दुवै पदबाट राजीनामा मागेका थिए ।
सम्बन्धित समाचार
वि.सं.२०७७ साउन १ बिहीवार २२:३६ मा प्रकाशित
