Sansar News
काठमाडौं । नेपाल कम्युुनिस्ट पार्टी (नेकपा)को स्थायी समिति बैठक आज (शुक्रबार) बस्दैछ । आन्तरिक विवादका कारण १७ असारयता चारपटकसम्म स्थगित स्थायी कमिटी बैठक आज बस्न लागेको हो ।
नेकपा स्रोतले जनाएअनुसार बैठक ११ बजेदेखि सुरु हुनेछ । बैठकको विषयमा दुई अध्यक्ष केपी शर्मा ओली र पुष्पकमल दाहाल ‘प्रचण्ड’बीच छलफल भईरहेको छ ।
यसअघि बिहिबार पार्टी विवाद समाधानका लागि ओली, दाहाल र वरिष्ठ नेता माधवकुमार नेपालबीच त्रिपक्षीय छलफल भएको थियो ।छलफलमा पार्टी विवाद समाधानबारे सहमती नभएपनि स्थायी समिति बैठक बसाल्ने भन्नेमा भने सहमती भएको थियो ।
आजको बैठकमा केन्द्रीय समिति बैठक बोलाउने बारे नेताहरुले प्रस्ताव राख्ने तयारी गरेका छन् । बिहिबार खुमलटार भएको दाहाल–नेपाल समहुको भेलाले पनि केन्द्रीय समिति बैठक बोलाएर पार्टी विवाद समाधान खोज्ने निष्कर्ष निकालेको थियो ।
गत असार १० गतेदेखि जारी स्थायी कमिटी बैठकमा प्रधानमन्त्री ओलीको राजीनामा मागिएसँगै विवाद उत्कर्षमा पुगेको थियो । नेकपाभित्रका प्रचण्ड–माधव समुहका ३० स्थायी समिति सदस्यले प्रधानमन्त्री ओलीको पार्टी अध्यक्ष र प्रधानमन्त्री दुवै पदबाट राजीनामा मागेका थिए ।
सम्बन्धित समाचार
वि.सं.२०७७ साउन २ शुक्रवार १०:१८ मा प्रकाशित
