हामी सबैकाे संसारन्यूज

४ साउन, काठमाडौँ । आफ्नै भान्जाको अपहरणपश्चात हत्या गरेको आरोप लागेका फरार सहोदर मामा १३ वर्षपछि पक्राउ परेका छन् । महानगरीय प्रहरी अपराध महाशाखाको टोलीले फरार अभियुक्त राजेश कुमार गुप्तालाई साउन ३ गते सर्लाहीको मलंगवा ८, गोरखकालीबाट पक्राउ  गरेको हो।

भारत बिहार राज्य सितामणी जिल्ला मुझफरपुर स्थायी घर भई काठमाडौँ खिचापोखरी बस्ने, वर्ष ११ का रोहित गुप्ताको अपहरण पश्चात २०६४/०६/२७ गते हत्या भएको थियो ।

अनुसन्धानमा सो अपहरण तथा हत्यामा योजनाकार निजकै सहोदर मामा राजेश कुमार गुप्ताको हात रहेको भन्दै प्रहरीले फरार अभियुक्तका रुपमा खोजि गरिरहेको थियो ।

राई स्कुल जोरपाटीमा कक्षा ७ मा अध्ययनरत रोहित गुप्ताको २०६४/६/२४ गते घरबाट बाहिर निस्केकोमा समयमा अपहरणमा परेका थिए । अपहरणपछि अपरिचित व्यक्तिले टेलिफोन गरी निजको बाबु बासुदेब गुप्तासँग छोरा अपहरणमा परेकोले रू.२,५०,००० (दुई लाख पचास हजार) फिरौती रकम दिएमा मात्र छोरा छाड्ने जानकारी गराएको तर फिरौती रकम प्राप्त भएपश्चात पनि बालक अपहरण मुक्त नभएको र खोजतलासका क्रममा मिति २०६४/०६/२७ गते कमलादीस्थित गणेश मन्दिर नजिक सडक पेटिमा प्लास्टिकको बोरामा पोको पारी फालिएको अवस्थामा लास फेला परेको प्रहरीले जनाएको छ ।

अपहरणकारी गुप्ताले धादिङ घर भएको विष्णु सुनारको सहयोगमा जादु सिकाउने बाहानामा बोलाई उक्त गोप्य कोठामा लगी दुबै हात पछाडी लगी माईला भन्ने बिष्णु सुनारले नाइलनको डोरिले घाँटिमा बाँधी कस्दा रोहित गुप्ता चिच्याउन लाग्दा राजेश गुप्ताले रुमालले मुख थुनी दुबै जनाले घुँडा समेतले थिचेर बालक रोहितको हत्या गरेको खुल्न आएको प्रहरीले जनाएको छ ।

घटना पश्चात मृतकको वुवा बासुदेव गुप्तालाई समेत झुक्यानमा पारी राजेश गुप्ता निजसँगै बसी प्रहरी कार्यालयमा गई केही समय सम्म खोजतलाश गरेको बहाना समेत गरी तत् पश्चात फरार रहेका थिए ।

घटनामा संलग्न बिष्णु सुनार मिति २०६४/०८/१२ गते पक्राउ परी हाल कारागारमा रहेको छन् ।