Sansar News
५ साउन, काठमाडौँ । सरकारले भदौ १ गतेबाट हवाई सेवा सञ्चालनमा ल्याउने भएको छ।
सोमवार बालुवाटारमा बसेको मन्त्री परिषद्को बैठकले पाँच महिनादेखि बन्द रहेको आन्तरिक तथा बाहृय उडान भदौ १ गतेबाट सुरु गर्ने निर्णय गरेको हो ।
नागरिक उड्डयन मन्त्रालयले हवाई उडानसम्बन्धी प्रोटोकल बनाउने र त्यसअनुसार भदौ १ बाट सेवा सुरु हुने बताइएको छ ।
संस्कृति, पर्यटन तथा नागरिक उड्डयन मन्त्रालयले हवाई उडान सेवा सञ्चालन गर्ने विषयमा कोभिड १९ संकट व्यवस्थापन केन्द्र (सीसीएमसी)मा प्रस्ताव पेश गरेको थियो । सोही प्रस्तावका आधारमा सरकारले उडानहरु सुचारु गर्ने निर्णय गरेको हो ।
नेपालमा कोरोना भाइरसको जोखिम बढेसँगै सरकारले कोरोना रोकथाम तथा नियन्त्रणका लागि लकडाउन लगाएको थियो। कोरोना रोकथाम तथा नियन्त्रणका लागि गतवर्ष चैत्र ११ गतेबाट आन्तरिक र बाह्य दुवै उडान उडान बन्द गरिएको थियो।
यसैबीच मन्त्रिपरिषद् बैठकले लकडाउनलाई अझै खुकुलो बनाउने निर्णय पनि गरेको छ । यथास्थितिको लकडाउन यही साउन ७ गते सकिँदैछ। त्यसपछिको चरणमा लकडाउनलाई अझै खुकुलो बनाउँदै लाने निर्णय पनि बैठकले गरेको जनाइएको छ ।
वि.सं.२०७७ साउन ५ सोमवार २१:४० मा प्रकाशित
