हामी सबैकाे संसारन्यूज

११ साउन, काठमाडौँ । नेपाल टेलिकममा केही दिन देखि जारी धर्ना यथावत रहेपनि वार्ता सकरात्मक रुपले अघि बढेको बताइएको छ ।

नेपाल दूरसंचार प्राधिकरणले नविकरण दस्तुरको नीतिगत व्यवस्था गर्नुपर्ने मुख्य मागसहित कर्मचारी सम्बन्धी विनियमावलीका अन्य विषय समेटेर टेलिकममा कार्यरत युनियनहरुले धर्ना लगायतका दबाब कार्यक्रम केही दिन यता संचालन गर्दै आएका छन् ।

नेपाल दूरसंचार राष्ट्रिय कर्मचारी संगठन (NTEAN) का अध्यक्ष यादव पनेरुका अनुसार टेलिकम व्यवस्थापनबाट हुन सक्ने अधिकांश मागमा सहमति भैरहेको छ भने व्यवस्थापनबाट पुरा हुन नसक्ने मागका लागि मन्त्रालय र सरकारसँग पहल जारी छ । पनेरुका अनुसार नविकरण दस्तुर वैज्ञानिक र आधारयुक्त बनाउन संसदको विकास समितिसँग पनि राम्रो छलफल भएको छ ।

लगातार आठ दिनदेखि जारी २ घण्टे धर्ना आज आइतबार पनि सम्पन्न भएको जनाइएको छ । वार्ता सकरात्मक भएपनि ठोस निर्णय नआउन्जेल धर्ना कार्यक्रम जारी रहने अध्यक्ष पनेरुले संसारन्यूजसँग बताएका छन् । सत्तारुढ नेकपा निकट मानिने सो संगठन बाहेक प्रमुख प्रतिपक्षि नेपाली काँग्रेस निकट NTC WU र अर्को स्वतन्त्र समूहको NTEU नामक युनियन पनि संयुक्त रुपमा धर्नामा छन् ।