Sansar News
काठमाडौं । नेकपाभित्र विवाद चर्किरहेको बेला प्रधानमन्त्री केपी शर्मा ओली उपाध्यक्ष बामदेव गौतमलाई भेट्न उनकै निवास भैंसैपाटी पुगेका छन् । ओली पार्टी महासचिव विष्णु पौडेललाई साथ लिएर भैंसेपाटी पुगेका हुन् ।
नेकपा स्रोतले जनाएअनुसार ओली गौतमलाई भेट्न साँझ ७ बजे गौतम निवास पुगेका थिए । जनाइएअनुसार अहिले उनीहरुका बीच छलफल सुरु भएको छ ।
मंगलबार प्रधानमन्त्रीसमेत रहेका पार्टी अध्यक्ष ओलीले अन्तिम समय एकतर्फी रुपमा स्थायी समिति बैठक स्थगित गराएसँगै नेकपाभित्रको विवादले चरमता लिएको छ । ओलीले स्थगित गराएपनि अर्का अध्यक्ष पुष्पकमल दाहाल ‘प्रचण्ड’ र माधव नेपाल पक्षीय नेताहरुले बालुवाटारमै स्थायी समिति बैठक बसालेका थिए । झण्डै दुई तिहाई सदस्यहरुको उपस्थितिमा बैठक सम्पन्न भएको थियो ।
बैठक सम्पन्न भएसँगै पार्टीभित्र एक्लीएका ओलीले वामदेवको साथ खोज्न उनलाई भेट्न पुगेका हुन् ।
मंगलबार पार्टी विवाद चुलिएको सन्दर्भमा उपाध्यक्षसमेत रहेका नेता गौतमले विवाद समाधानको उपाय भन्दै ६ बुँदे प्रस्ताव अघि सारेका थिए । उनले अघि सारेको प्रस्तावमा पार्टी विग्रह रोक्न ओलीलाई ५ वर्ष नै प्रधानमन्त्री दिनुपर्ने प्रस्ताव गरेका थिए । सो प्रस्तावसँगै गौतम ओलीको क्याम्पमा पुगेको विश्लेषण हुन थालेको छ ।
वि.सं.२०७७ साउन १३ मंगलवार २०:५९ मा प्रकाशित
