Sansar News
काठमाडौं । उद्योग वाणिज्य तथा आपूर्ति मन्त्री लेखराज भट्टले आफूँलाई ज्यान मार्ने धम्की आएको बताएका छन् । बिहीबार संसदको उद्योण वाणिज्य तथा उपभोक्ता हित समितिको बैठकमा मन्त्री भट्टले आफुँलाई ज्यानमार्ने धम्की आएको बताएका हुन् ।
उनले बताएअनुसार उनलाई उनकै छिमेकी जिल्ला बझाङबाट ज्यान मार्ने धम्की आएको हो ।
कसले किन दियो ज्यान मार्ने धम्की ?
मन्त्री भट्टले बताएअनुसार उनलाई अमेरिकी सहयोग परियोजना (एमसीसी)को पक्षमा लागेमा टाउको काट्ने धम्की आएको हो । ‘अस्ती मलाई एउटा फोन आयो, बझाङ जिल्लाबाट एमसीसीको बारेमा’ बैठकमा उनले भने, ‘तैले समर्थन गरिस् भने तेरो टाउको काटिन्छ । शब्दै यही छ ।’
मन्त्री भट्टले आफूले एमसिसी सम्झौता पढेको छ भनेर सोध्दा पढ्ने जिम्मा आफ्नो नभएको तर पास नगर्ने भनेपछि नगर्ने भन्ने जवाफ दिएको समेत बताए । ‘अनि मैले भाइ तपाईले (सम्झौता) पढ्नुभएको छ, भनेँ, किन पढ्नुपर्यो पास नगर्ने भनेसि नगर्ने, पढ्ने तेरो जिम्मा हो भने’ मन्त्री भट्टले थपे ।
उनले प्रष्ट नखुलाएपनि उनीमाथि ज्यानमार्ने धम्की नेत्रविक्रम चन्द विप्लव समुहले दिएको हुनसक्ने अनुमान गरिएको छ । यसअघि पनि विप्लव समुहले सत्तारुढ दलकै नेताहरुलाई धम्की दिएको विषय बाहिर आएको थियो ।
वि.सं.२०७७ साउन १५ बिहीवार १७:०२ मा प्रकाशित
