हामी सबैकाे संसारन्यूज

काठमाडौं । हङकङमा राष्ट्रिय सुरक्षा कानून लागु भएसँगै विधान परिषद चुनाव स्थगित गर्ने फैसलाप्रति अमेरिकाले कडा टिप्पणी गरेको छ । अमेरिकी विदेशमन्त्री माइक पोम्पिओले हङकङ चुनाव स्थगनको पछाडि बेजिङ्गको हात रहेको आरोप लगाएका छन् ।

उनले चिनियाँ कम्युनिष्ट पार्टी हङकङमा लोकतन्त्रको हत्या गर्न उद्धत रहेको बताए । हङकङका प्रत्याशीमाथि चीनले अनावश्यक दमनात्मक कारबाही गरीरहेको उनको आरोप छ ।

आगामी ६ सेक्टेम्बरमा तय भएको हङकङ विधान परिषद चुनावलाई कोरोना महामारीको कारण देखाउँदै शुक्रबार स्थगन गर्ने निर्णय गरिएको थियो । जसबारे आइतबार अमेरिकी विदेशमन्त्रीले कोरोना महामारी चुनाव स्थगनको कारण नभएको बताएका हुन् ।

पोम्पिओले चुनाव स्थगनको निर्णय योजनाबद्ध रणनीति भएको बताएका छन् । उनले हङकङमा स्वतन्त्रता चाहने नागरिकको चिनियाँ सरकारले दमन गरिरहेको आरोप लगाए । उठेका उम्मेदवारका समर्थकमाथि चिनियाँ सरकारले उत्पीडन गरिरहेको उनको आरोप छ । एजेन्सीबाट