हामी सबैकाे संसारन्यूज

१९ साउन, यूके । कोरोना भाइरस(कोभिड १९) अहिले विश्वकै लागि टाउको दुखाइको विषय बनेको छ । यसको कुनै अचुक उपचार त छैन भने परीक्षणको नतिजा आउन पनि केही दिन नै कुर्नु पर्ने अवस्था छ । तर अब यूकेले भने परीक्षणको डेढ घण्टामै नतिजा दिने परीक्षण विधि सुरु गर्न लागेको छ ।

नमुना सङ्कलन गरेको ९० मिनेटमै नतिजा आउने नयाँ ‘जीवन रक्षक’ कोरोनाभाइरस परीक्षण विधि यूकेमा आगामी साताबाट सुरु गर्न लागिएको विविसिले समाचारमा जनाएको छ ।

हालको परीक्षण प्रकृया अन्तर्गत तीन चौथाइ नतिजा २४ घण्टाभित्रै आइसक्ने भएपनि एक चौथाइ नतिजाका लागि दुई दिनसम्म लाग्ने गरेको छ ।
सो परीक्षणको पाँच लाख किट यूकेका वृद्ध हेरचाह केन्द्र र परीक्षण केन्द्रमा आगामी साता उपलब्ध हुने र यो वर्ष थप लाखौँ त्यस्ता किट बनाइने पनि समाचारमा जनाइएको छ ।

कोभिड– १९ र अन्य मौसमी बिरामीबीच छुट्याउन सकिने त्यस्तो स्वाब र डीएनए परीक्षण जाडो याममा निकै उपयोगी हुने ब्रिटेनका स्वास्थ्यमन्त्रीले बताएका छन्।स्वास्थ्यमन्त्री म्याट ह्यान्ककले कोरोनाभाइरस परीक्षणसम्बन्धी यो नयाँ विकसित प्रविधि जीवन रक्षक हुने पनि बताए।

परीक्षण किट बनाएको अक्सफोर्ड नानोपोरका प्रमुख कार्यकारी गोर्डन साङ्घेराले यो परीक्षण विश्वभरका लागि सस्तो र सहज परीक्षण हुने सम्भावना रहेको बताए।

यो परीक्षणको सबैभन्दा ठूलो फाइदा भनेको जाडो याममा लाग्ने अन्य फ्लुबाट कोभिड– १९ लाई छुट्याउन सकिनु रहेको बताइएको छ ।