काठमाडौं । सत्तारुढ नेकपाका अध्यक्ष पुष्पकमल दाहाल ‘प्रचण्ड’ पार्टी उपाध्यक्ष वामदेव गौतमलाई भेट्न भैंसेपाटी पुगेका छन् । दाहाल सचिवालयले जनाएअनुसार प्रचण्ड केहि बेरअघि भैंसेपाटी पुगेका हुन् ।
सचिवालयले जानकारी दिएअनुसार पछिल्लो राजनीतिक अवस्थाबारे दुई नेताबीच छलफल चलिरहेको छ ।
गौतमले गत साउन १३ मा ६ बुँदे प्रेस नोटमार्फत आफ्नो धारणा स्पष्ट पारेका थिए । उनले एकताको महाधिवेशनसम्म अध्यक्ष र पाँच वर्ष नै केपी शर्मा ओली प्रधानमन्त्री हुने प्रस्ताव गरेका थिए । ६ बुँदे प्रस्ताव राखेकै साँझ प्रधानमन्त्री ओली उनलाई भेट्न भैंसेपाटी पुगेका थिए ।
गत साउन १३ मा ६ बुँदे प्रस्ताव अघि सारेसँगै गौतमप्रति दाहाल–नेपाल समुहले शंकापूर्णं रुपमा व्यवहार गरेको छ । उनलाई प्रधानमन्त्री केपी शर्मा ओली निकट भएको विश्लेषण गरिन थालिएको छ ।
पछिल्ला ओली–दाहाल बैठकमा ओलीले स्थायी समिति बैठकको विकल्पमा सचिवालय बैठकको प्रस्ताव गरेसँगै दाहाल संशकीत देखिएका छन् । ओलीले सचिवालयबाट बहुमत पुर्याउन सक्ने अनुमान गरिएको अवस्थामा प्रचण्डको भैंसेपाटी भेटलाई अर्थपूर्णं हेरिएको छ ।
आज साँझ नै ओली–दाहालबीच बैठकको कार्यक्रमसमेत तय भएको छ ।
वि.सं.२०७७ साउन २० मंगलवार १२:४८ मा प्रकाशित